رئیس نیروهای مرزی بدخشان تاجیکستان "در درگیری با کسانی که از افغانستان آمده بودند" کشته شد
منابع به افغانستان اینترنشنال گفتند کامران رجب‌زاده، رئیس اداره نیروهای مرزی بدخشان تاجیکستان در درگیری با افراد مسلحی که از افغانستان وارد شده بودند، کشته شد. کمیته امنیت ملی تاجیکستان بدون نام بردن از کامران رجب‌زاده گفته یک نظامی این کشور در درگیری با قاچاقچیان کشته شده است.
کمیته امنیت ملی تاجیکستان هویت این نظامی را اعلام نکرده، اما منابع به افغانستان اینترنشنال گفتند این نظامی کامران رجب‌زاده بود که با شلیک گلوله کشته شده است.
منابع محلی به افغانستان اینترنشنال گفتند که جنازه کامران رجب‌زاده روز جمعه هشتم ثور به خانواده‌اش تحویل داده شده و دفن شده است.
مقامات تاجیکستان به صورت رسمی تاکنون در مورد کشته شدن این مقام امنیتی بدخشان توضیحی نداده‌اند.
بر اساس گزارش‌ها، درگیری با قاچاقچیان مسلح شب گذشته هفتم ثور در شهر خاروغ تاجیکستان رخ داده است.
خاور، خبرگزاری دولتی تاجیکستان نیز گزارش داده که شب گذشته ۸ قاچاقچی مسلح از افغانستان وارد تاجیکستان شده بودند.
بر اساس اطلاعات منتشر شده، سه تن از قاچاقچیان بازداشت و مابقی به افغانستان متواری شدند.
کمیته امنیت ملی تاجیکستان روز چهارشنبه اعلام کرده بود که دو تروریست که از افغانستان وارد کشورشان شده بودند فورا هدف قرار گرفتند و کشته شدند.