رئیسجمهور تاجیکستان از افزایش قاچاق مواد مخدر از افغانستان و نفوذ گروههای تروریستی از این کشور به تاجیکستان خبر داد.
امامعلی رحمان گفته است: «ما افزایش فعالیت گروههای تروریستی مختلف در افغانستان را احساس میکنیم.»
او روز پنجشنبه (۲۳ سنبله) در پنجمین نشست مشورتی سران کشورهای آسیای میانه در شهر دوشنبه گفت: «در سالهای اخیر با تلاشهایی برای نفوذ و عبور غیرقانونی از مرزهای دولتی توسط گروههای تروریستی مختلف مواجه بودهایم.»
امامعلی رحمان افزود که این کشور اخیرا از نفوذ اعضای گروه جماعت انصارالله از مرز افغانستان به تاجیکستان جلوگیری کرده است.
رئیسجمهور تاجیکستان گفت: «آنها به دنبال انجام یک سری حملات تروریستی در پایتخت و سایر مناطق تاجیکستان بودند.»
خبرگزاری خاور تاجیکستان روز چهارشنبه (۱۵ سنبله) گزارش داد که اعضای جماعت انصارالله در ۲۹ تا ۳۰ آگست، به منظور انجام اقدامات تروریستی وارد خاک تاجیکستان شدند. کمیته امنیت ملی تاجیکستان پس از آن اعلام کرد که این تروریستها از افغانستان وارد این کشور شده بودند که هدف قرار گرفتند و کشته شدند.
امامعلی رحمان از افزایش قاچاق مواد مخدر به افغانستان هم به سران کشورهای آسیای میانه هشدار داد.
او گفت مقامات ذیصلاح تاجیکستان در سال ۲۰۲۲ حدود پنج تن مواد مخدر را در مرز با افغانستان کشف و ضبط کردند که نسبت به سال ۲۰۲۱، ۲۲ درصد بیشتر است.
پنجمین نشست مشورتی سران کشورهای آسیای میانه روز پنجشنبه (۲۳ سنبله) به مدت دو روز در شهر دوشنبه برگزار شد.
علاوه بر امامعلی رحمان، روسای جمهور قزاقستان، قرقیزستان، ترکمنستان و اوزبیکستان در این نشست حضور داشتند. الهام علیاف، رئیسجمهور آذربایجان به عنوان مهمان ویژه در این نشست حضور داشت.