پس از آنکه سفیر افغانستان در تاجیکستان معرفی نامه یک دیپلومات طالبان را پاره کرد، نقیب‌الله دهقان‌زاده سرپرست قنسولگری افغانستان در شهر خاروغ تاجیکستان می‌گوید که این قنسولگری به طور مستقیم تحت حمایت و زیر نظر وزارت خارجه طالبان کار می‌کند.

ضیا احمد تکل، معاون سخنگوی وزارت خارجه طالبان روز پنجشنبه (۱۸ عقرب) با پخش ویدیویی نقیب‌الله دهقان‌زاده، در شبکه اجتماعی اکس نوشت که قنسولگری افغانستان در شهر خاروغ زیر نظر این گروه کار می کند.

نقیب‌الله دهقان‌زاده، سرپرست قنسولگری افغانستان در خاروغ تاجیکستان در این ویدیو به سخنان اخیر ظاهر اغبر، سفیر افغانستان در تاجیکستان واکنش نشان داد.

آقای دهقان‌زاده، اظهارات ظاهر اغبر را «غیر مسئولانه و عاری از حقیقت» دانست. او تصریح کرد که «قنسولگری افغانستان مقیم خاروغ تاجیکستان مستقیما تحت حمایت وزارت خارجه طالبان است و مطابق به اصول و صلاحیت‌های قانونی خود فعالیت می‌کند.»

وزارت خارجه طالبان اخیرا فردی به نام فیض‌الله را به عنوان سکرتر اول در سفارت افغانستان در تاجیکستان تعیین کرده کرد.
در پی معرفی دیپلومات طالبان به سفارت افغانستان در تاجیکستان، ظاهر اغبر روز سه‌شنبه (۱۶ عقرب) در یک نشست خبری معرفی‌نامه این دیپلمات طالبان را پاره کرد.

ظاهر اغبر گفت که تا آمدن یک حکومت مشروع در افغانستان از سفارت این کشور در تاجیکستان محافظت خواهد کرد. آقای اغبر، این سفارت را «امانت مردم افغانستان» دانست.

آقای دهقان‌زاده مدعی است که پس از سقوط جمهوریت، دامنه فعالیت های این نمایندگی برای خدماتی همچون صدور پاسپورت و صدور ویزا برای افغان‌های مقیم تاجیکستان گسترش یافته است.

او اذعان کرد که در بخش‌های ترانزیت، تجارت، مسایل مرزی، زندانیان حقوقی و جنایی با مقامات جمهوری تاجیکستان هماهنگی وجود دارد.