سفارت امریکا برای افغانستان از تاجیکستان بخاطر تسلیم ندادن هواپیماهای ارتش حکومت پیشین افغانستان به طالبان قدردانی کرد. این سفارت به افغانستان اینترنشنال گفت هواپیماها مالکیت ارتش امریکا است و گفت‌وگو درباره سرنوشت آنها با تاجیکستان جریان دارد.
این سفارتخانه روز یکشنبه، ۱۸ سنبله، در یک پیام کتبی به افغانستان اینترنشنال نوشت که امریکا درحال گفت‌وگو با تاجیکستان برای تصمیم‌گیری درباره سرنوشت این هواپیماها است.
واشنگتن همچنین از دوشنبه به خاطر نگهداری این هواپیماها قدردانی کرد.
پس از سقوط نظام جمهوری اسلامی افغانستان در اسد ۱۴۰۰، تعدادی از هواپیماهای ارتش حکومت پیشین به اوزبیکستان و تاجیکستان منتقل شدند.
وزارت دفاع امریکا پیشتر گفته بود که تا ۲۱ اگست سال ۲۰۲۱، ۴۶ فروند هواپیما به اوزبیکستان و ۱۸ فروند دیگر به تاجیکستان پرواز کرد. این هواپیماها شامل چرخبال‌های Mi-17 UH-60 و همچنین PC-12 ،C-208 ،AC-208 و A-29 هواپیماهای بال ثابت هستند.
مقام‌های وزارت دفاع طالبان نیز در ماه قوس ۱۴۰۱ گفتند که اوزبیکستان و تاجیکستان به درخواست این گروه برای بازگرداندن هواپیماهای افغانستان پاسخ نداده‌اند.
پیشتر سفیر امریکا در اوزبیکستان نیز اعلام کرد که بنا به یک توافق جدید، ۴۶ هواپیما و چرخبال ارتش سابق افغانستان در اختیار حکومت اوزبیکستان باقی می‌ماند.
طالبان توافق امریکا و اوزبیکستان درباره هلیکوپترهای ارتش پیشین افغانستان را غیرقابل قبول خواند. وزارت دفاع طالبان گفت امریکا حق اهدا و مصادره اموال مردم افغانستان را ندارد و از اوزبیکستان خواست هواپیماهای نیروی هوایی افغانستان را تحویل دهد.
مقامات اوزبیکستان در تاریخ ۱۵ اگست ۲۰۲۱ اعلام کردند که ۲۲ فروند هواپیمای نظامی و ۲۴ چرخبال نیروهای مسلح افغانستان وارد حریم هوایی اوزبیکستان شدند.
اشرف‌غنی، رئیس‌جمهور پیشین افغانستان، به همراه جمعی از همکارانش نیز با استفاده از سه چرخبال نظامی به اوزبیکستان فرار کرد و سپس به امارات متحده عربی رفت.
