با ختم مهلت اقامت مهاجران افغان در پاکستان به روز دوشنبه، وزارت داخله این کشور در جلسه‌ای ویژه بار دیگر دستور بازداشت و اخراج افغان‌ها را صادر کرده است. این وزارت همچنین از نهادهای مجری قانون خواسته تا گزارش‌های روزانه مرتبط با بازداشت مهاجران افغان را به این وزارت ارائه دهند.
پس از این دستور، تیم‌های پولیس برای جستجوی اتباع افغانستان در مناطق مختلف تشکیل شده و عملیات بازداشت را آغاز کرده‌اند.
پولیس شهر راولپندی نیز اعلام کرده است که عملیات جستجو در حوزه‌های تحت پوشش خود را برای شناسایی مهاجران افغان فاقد مدرک آغاز کرده و شماری را نیز بازداشت کرده است.
به‌رغم هشدار و درخواست مکرر سازمان‌های بین‌المللی مبنی بر توقف روند اخراج مهاجران افغان، پاکستان طبق تعهد قبلی روند اخراج حدود ۱.۴ میلیون افغان دارای کارت شناسایی را ادامه داده است.
پولیس پاکستان می‌گوید علاوه بر دارندگان کارت‌های (پی‌او‌آر)، حدود ۸۰۰ هزار افغان دارای کارت‌های «شهروندی افغان» نیز به‌طور «غیرقانونی» در کشور زندگی می‌کنند و باید اخراج شوند.
روز دوشنبه، همزمان با پایان مهلت اقامت، رسانه‌ها از ازدحام و تراکم مهاجران افغان در گذرگاه تورخم گزارش دادند.
