مقامات وزارت‌های خارجه پاکستان و تاجیکستان در نشستی در شهر دوشنبه درباره همکاری مشترک و مبارزه با تروریسم در منطقه گفت‌وگو کردند. وزارت امور خارجه پاکستان روز پنج‌شنبه در بیانیه‌ای اعلام کرد که در این نشست، درباره همکاری دفاعی میان دو کشور نیز گفت‌وگو شده است.
به گفته این وزارت، در این نشست علاوه بر همکاری‌های دفاعی و مبارزه با تروریسم، درباره پروژه انتقال برق کاسا-۱۰۰۰ که از افغانستان نیز عبور می‌کند، بحث و تبادل نظر صورت گرفت.
همچنین، دو طرف درباره راه‌های گسترش روابط تجاری، همکاری‌های سیاسی، زراعت و آموزش و پرورش گفت‌وگو کردند.
وزارت خارجه تاجیکستان نیز در خبرنامه‌ای گفت که در این نشست دوجانبه، هیئت تاجیکستان به رهبری فرخ شریف‌زاده، معاون وزیر امور خارجه، و هیئت پاکستان به رهبری سید اسد علی گیلانی، معاون وزیر امور خارجه، حضور داشتند.
به گفته این وزارت، هر دو طرف بر تعهد خود به تقویت بیشتر همکاری استراتژیک میان تاجیکستان و پاکستان تاکید کردند.
این نشست درحالی برگزار می‌شود که دو کشور همسایه پاکستان و تاجیکستان بارها درباره وضعیت امنیتی افغانستان ابراز نگرانی کرده بودند.
هر دو کشور اعلام کرده‌اند که حضور گروه‌های تروریستی مانند تحریک طالبان پاکستان و انصارالله در افغانستان، تهدیدی جدی برای منطقه است.
