سه شهروند چین در مرز افغانستان و تاجیکستان کشته شدند

این وزارت روز پنجشنبه (شش قوس) در بیانیه‌ای اعلام کرد که این حمله شب گذشته از قلمرو افغانستان بر قرارگاه کارکنان این شرکت در ناحیه شمس‌الدین شاهین صورت گرفته است.

تاجیکستان این حمله را کار «گروه‌های جنایتکار » در افغانستان خوانده است.

در متن بیانیه آمده است: «این حمله با استفاده از سلاح‌های آتشین و یک پهپاد مجهز به نارنجک انجام شده است. در نتیجه آن، سه کارمند شرکت "شاهین اس‌ام" که شهروندان چین بودند، کشته شدند.»

وزارت خارجه تاجیکستان حمله بر قلمرو خود و کشته شدن شهروندان چین را به شدت محکوم کرد و از طالبان در افغانستان خواست تا برای تأمین امنیت و ثبات در مرز، تدابیر مؤثر اتخاذ کند.

در بیانیه همچنین آمده است که با وجود تلاش‌های مداوم تاجیکستان برای حفظ امنیت و ایجاد همکاری در مناطق مرزی، گروه‌های جنایتکار در خاک افغانستان همچنان به اقدامات خود برای برهم زدن وضعیت مرزی ادامه می‌دهند.

دولت چین و اداره طالبان تاکنون در این مورد چیزی نگفته‌اند.

همزمان، هیئتی به ریاست محمداسماعیل غزنوی، والی طالبان در بدخشان، برای گفت‌وگو درباره افزایش هماهنگی در گذرگاه‌ها و مسائل مرزی به تاجیکستان سفر کرده است.

عابدالله فاروقی، سخنگوی پولیس سرحدی طالبان، گفت که این هیئت با شماری از مقامات بلندپایه امنیتی تاجیکستان دیدار می‌کند.