سران کشورهای عضو سازمان پیمان امنیت جمعی در نشستی که در بیشکک برگزار شده بود، بر «افغانستان مستقل، بی‌طرف، صلح‌دوست، عاری از تروریسم، جنگ و مواد مخدر» تاکید کردند. آن‌ها گفتند که سازمان پیمان امنیت جمعی آماده مشارکت در تلاش‌های بین‌المللی برای تأمین صلح و توسعه افغانستان است.
اجلاس سران سازمان پیمان امنیتی جمعی روز پنجشنبه (ششم قوس) با حضور روسای جمهوری روسیه، بلاروس، قزاقستان، قرغیزستان و تاجیکستان برگزار شد.
در بیانیه‌ای که پس از این نشست در وب‌سایت سازمان پیمان امنیت جمعی منتشر شده، آمده است: «ما تعهد خود را به تبدیل افغانستان به عنوان یک کشور مستقل، بی‌طرف و صلح‌دوست، عاری از تروریسم، جنگ و مواد مخدر، مجددا تأیید می‌کنیم. ما آمادگی خود را برای مشارکت در تلاش‌های بین‌المللی برای تضمین صلح و توسعه در آن کشور ابراز می‌کنیم.»
پیش از این، در اجلاس سران کشورهای مستقل مشترک‌المنافع، امامعلی رحمان، رئیس‌جمهور تاجیکستان از برنامه بین دولتی کشورهای منطقه برای تقویت مرز بین تاجیکستان و افغانستان قدردانی کرد.
کشورهای آسیای میانه با وجود روابط گسترده سیاسی و اقتصادی با اداره طالبان، نگران نفوذ افراط‌گرایان و حملات از خاک افغانستان‌اند.
وزارت خارجه تاجیکستان روز گذشته گزارش داد که سه کارگر چینی در حمله‌ای از خاک افغانستان کشته شدند.
تاجیکستان می‌گوید که این کارگران در نتیجه یک حمله پهپادی از خاک افغانستان بر محل کارشان در شرکت استخراج طلای «شاهین اس‌ام» در منطقه مرزی ولایت ختلان کشته شدند.
چین از شهروندانش خواست منطقه مرزی را ترک کنند
سفارت چین در شهر دوشنبه تایید کرده است که در یک حمله مسلحانه در مرز تاجیکستان با افغانستان سه شهروندنش کشته شده‌اند.
این سفارت به شهروندان چین توصیه کرده تا این منطقه مرزی را تخلیه کنند.
سفارت چین در شهر دوشنبه از اینکه عوامل این حادثه چه کسانیاند، چیزی نگفته است، اما گفت که بیجینگ از تاجیکستان خواسته است تا در این مورد تحقیق کند.
وزارت خارجه طالبان کشته شدن شهروندان چین را محکوم کرد. این وزارت گفت بر اساس ارزیابی اولیه و اطلاعات ارائه شده توسط نهادهای ذیربط اداره طالبان، در این رویداد «دست حلقاتی در کار است که برای ایجاد آشوب، بیثباتی و دامن زدن به بیاعتمادی میان کشورهای منطقه تلاش میکنند.»
پیش از این، رهبران چین و پنج کشور آسیای میانه در ماه جوزای امسال در نشستی در قزاقستان، از طالبان خواستند که افغانستان را عاری از گروههای تروریستی کند.
