کمیته امنیت ملی تاجیکستان از درگیری مسلحانه با تروریستهایی که از افغانستان به تاجیکستان نفوذ کرده بودند، خبر داد. این نهاد گفت که در این درگیری سه عضو یک سازمان تروریستی و دو مرزبان تاجیکستان کشته شدند.
خاور، خبرگزاری دولتی تاجیکستان روز پنجشنبه ۴ جدی به نقل از کمیته امنیت ملی این کشور گزارش داد که سه عضو یک سازمان تروریستی از مرز افغانستان عبور کرده و وارد خاک جمهوری تاجیکستان در منطقه شمسالدین شاهین شده بودند.
گفته شده مرزبانی تاجیکستان ساعت ۱۱:۱۵ صبح ۲۴ دسامبر، محل تروریستها در خاک جمهوری تاجیکستان را مشخص و عملیات علیه آنها را آغاز کردند.
طبق گزارش، تروریستها از دستور تسلیم مرزبانان تاجیک اطاعت نکردند و مقاومت مسلحانه انجام دادند. آنها قصد داشتند به یکی از پاسگاههای مرزی نیروهای مرزی کمیته دولتی امنیت ملی تاجیکستان حمله مسلحانه انجام دهند که با شلیک متقابل کشته شدند.
هویت افراد کشته شده و اینکه این سه نفر عضویت کدام گروه تروریستی را داشتهاند هنوز اعلام نشده است.
کمیته امنیت ملی تاجیکستان گفته است که از تروریستها مقداری تسلیحات و مهمات نیز به دست آمده است.
اسامی دو مرزبان تاجیک که در این عملیات کشته شدند، نوروزبیکوف زرهبان ناگزیبکوویچ و قربانوف عصمتالله غلاموویچ، اعلام شده است.
کمیته امنیت ملی تاجیکستان میگوید در ماه گذشته، این سومین حمله مسلحانه، اقدام تروریستی و عبور از مرز دولتی از افغانستان به تاجیکستان است که در نتیجه آن پرسنل نظامی کشته شدند.
طالبان عذرخواهی کند
کمیته امنیت ملی تاجیکستان میگوید حملات پیهم در یک ماه گذشته ثابت میکند که اداره طالبان در انجام تعهدات بینالمللی و وعدههای مداوم خود برای تأمین امنیت و ثبات در مرز دولتی با جمهوری تاجیکستان و مبارزه با اعضای سازمانهای تروریستی، بیمسئولیتی و بیمسئولیتی جدی و مکرر را نشان میدهد.
مرزبانی تاجیکستان اظهار امیدواری کرده که رهبری طالبان از مردم تاجیکستان عذرخواهی کند و اقدامات مؤثر دیگری را برای تأمین امنیت مرزهای مشترک با تاجیکستان انجام دهد.
نیروهای مرزی کمیته دولتی امنیت ملی جمهوری تاجیکستان قاطعانه اعلام کرده که از تواناییهای کامل فیزیکی و رزمی برای تأمین امنیت مرزهای دولتی برخوردار است.
گفته شده که در آینده نیز مرزبانان تاجیکستان با تمام توان به محافظت از مرزهای خود در برابر تجاوز خارجی ادامه خواهند داد و مانند همیشه، پاسخ شایستهای به گروههای تروریستی، قاچاقچیان و هرگونه تلاش برای عبور از مرز از افغانستان خواهند داد.
طبق بیانیه، در حال حاضر، اوضاع در مرز تاجیکستان و افغانستان آرام است و تحقیقات در مورد درگیری همچنان ادامه دارد.
دفتر مطبوعاتی ریاستجمهوری تاجیکستان ماه قوس نیز تائید کرد که در دو حمله که از افغانستان انجام شده بود، پنج نفر کشته و پنج نفر دیگر زخمی شدهاند. در پی آن، امامعلی رحمان، رئیسجمهور تاجیکستان به نهادهای امنیتی دستور داد که وضعیت و راههای تقویت امنیت مرزی را بررسی کنند.
تاجیکستان در اوایل بازگشت طالبان به قدرت، از منتقدان اداره طالبان بود، اما اخیرا روابط خود را با کابل گسترش داد و رو به تعامل آورده بود.
