با گذشت یک روز از حمله مسلحانه شبه‌نظامیان از خاک افغانستان به مرزبانان تاجیکستان، طالبان تاکنون در مورد این رویداد واکنشی نشان نداده است. افراد مسلح بامداد پنجشنبه با عبور از افغانستان به خاک تاجیکستان دو تن از نیروهای مرزبانی این کشور را کشتند.
حکومت تاجیکستان روز پنجشنبه، ۴ جدی، اعلام کرد که سه عضو یک سازمان تروریستی از مرز افغانستان عبور کرده و وارد خاک جمهوری تاجیکستان در ولسوالی شمس‌الدین شاهین شده بودند.
به گفته مقام‌های تاجیک، در جریان درگیری میان مرزبانان تاجیک و افراد مسلح، سه شبه‌نظامی و دو نیروی امنیتی تاجیکستان کشته شدند.
پس از این رویداد، حکومت تاجیکستان از طالبان خواست تا به خاطر این حمله عذرخواهی کند. کمیته امنیت ملی تاجیکستان اعلام کرده است که تکرار حملات مسلحانه در یک ماه گذشته نشان می‌دهد اداره طالبان در انجام تعهدات بین‌المللی و وعده‌های مکرر خود برای تامین امنیت و ثبات در مرزهای مشترک با تاجیکستان و مبارزه با گروه‌های تروریستی، به‌گونه جدی و مکرر بی‌مسئولیتی نشان داده است.
نیروهای مرزبانی تاجیکستان ابراز امیدواری کرده‌اند که رهبری طالبان از مردم تاجیکستان پوزش بخواهد و اقدامات عملی و مؤثر برای تأمین امنیت مرزهای مشترک دو کشور روی دست گیرد.
تاکنون روشن نیست که این شبه‌نظامیان وابسته به کدام گروه تروریستی بوده‌اند. در مناطق مرزی تاجیکستان، گروه‌هایی چون داعش، القاعده، جنگجویان اویغور، انصارالله و تحریک اسلامی اوزبیکستان فعالیت دارند.
کمیته امنیت ملی تاجیکستان افزوده است که این رویداد سومین حمله مسلحانه و اقدام تروریستی در یک ماه گذشته است که با عبور افراد مسلح از خاک افغانستان به تاجیکستان انجام شده و به کشته‌شدن نیروهای نظامی انجامیده است.
در دو رویداد پیشین، شهروندان چینی در ولایت‌های ختلان و بدخشان تاجیکستان هدف حمله قرار گرفته بودند که در نتیجه آن دست‌کم پنج شهروند چین کشته و شماری دیگر زخمی شدند.
حکومت تاجیکستان اعلام کرده بود که شبه‌نظامیان با استفاده از خاک افغانستان این حملات را علیه شهروندان چین انجام داده‌اند. این شهروندان در معادن محلی نزدیک به مرز افغانستان مشغول کار بودند. نهادهای امنیتی تاجیکستان گفته‌اند که در این حملات از پهپاد استفاده شده است.
در پی این رویداد وزارت خارجه طالبان آمادگی خود را برای تحقیقات مشترک اعلام کرد.
طالبان بارها گفته است که از خاک افغانستان علیه هیچ کشوری حمله نخواهد شد.
با این حال، شماری از ناظران باور دارند که طالبان از حضور و تحرک گروه‌های شبه‌نظامی به‌عنوان ابزار فشار بر کشورهای منطقه استفاده می‌کند.
تاجیکستان در یک سال گذشته تلاش کرده است روابط خود را با طالبان از سر گیرد. هیئت‌هایی از این کشور به کابل و مزار شریف سفر کرده و با مقام‌های طالبان در مورد روابط دوجانبه و امنیت مرزی گفت‌وگو کرده‌اند. اما به باور ناظران، این تلاش‌ها نتوانسته است مانع ادامه حملات شبه‌نظامیان به خاک تاجیکستان شود.
تاجیکستان همچنان در چهار سال گذشته میزبان گروه‌های مخالف طالبان، از جمله رهبران جبهه مقاومت ملی بوده است.
