شماری از فعالان حقوق بشر افغان که اخیرا از تاجیکستان اخراج شده‌اند، به افغانستان اینترنشنال گفته‌اند که در افغانستان با تهدیدهای جدی امنیتی مواجهند. آنان می‌گویند به‌رغم اقامت قانونی و پرداخت مالیات و کرایه خانه به‌طور منظم، از شهرهای دوشنبه، وحدت و خجند «به‌زور» اخراج شدند.
این فعالان حقوق بشر روز جمعه، ۱۸ ثور، به افغانستان اینترنشنال گفته‌اند که پس از تسلط طالبان بر افغانستان، در برابر سیاست‌های این گروه اعتراض و فعالیت کرده‌اند؛ موضوعی که به گفته آنان باعث شد هدف تهدید قرار بگیرند و به تاجیکستان پناه ببرند.
یکی از این فعالان به افغانستان اینترنشنال گفت پس از بازگشت به افغانستان، نه‌تنها امنیت جانی ندارد، بلکه بسیاری از اخراج‌شدگان با مشکلات شدید اقتصادی و نبود سرپناه نیز مواجه شده‌اند. او افزود که آینده این خانواده‌ها نامعلوم است.
این فعال همچنین روایت کرده است که هنگام اخراج، با خانواده مردی روبه‌رو شده که به قتل یک زن تاجیکستانی متهم است. به گفته این فعال افغان، پدر این فرد ادعا کرده که پسرش بی‌گناه است و خانواده‌شان پس از ۱۸ سال زندگی در تاجیکستان، اکنون با زندانی‌شدن پسرشان و اخراج اجباری خانواده روبه‌رو شده‌اند.
تاجیکستان روز سه‌شنبه، ۱۵ ثور، پس از متهم‌شدن یک شهروند افغان به قتل یک زن تاجیکستانی، ۲۵۰ خانواده افغان را از این کشور اخراج کرد.
پیشتر وزارت داخله تاجیکستان اعلام کرد که یک پناهجوی ۲۲ ساله افغان را به اتهام قتل یک زن ۲۷ ساله تاجیکستانی در اواخر ماه اپریل بازداشت کرده است.
