دفتر ریاست جمهوری تاجیکستان اعلام کرد که امامعلی رحمان رئیس جمهور این کشور و شی جینپینگ رئیس جمهور چین در پکن در مورد افغانستان گفتگو کردند. روسای جمهور هر دو کشور همسایه افغانستان درباره مبارزه با تروریسم، افراطگرایی، جرایم سازمان یافته و قاچاق مواد مخدر گفتگو کردند.
تاجیکستان و چین اعضای سازمان همکاری شانگهای هستند؛ سازمانی که اعضای آن به دنبال تسلط طالبان بر افغانستان، همکاریهای خود را گسترش داده است.
طالبان هرچند وعده داده که با همه گروههای تروریستی مقابله خواهد کرد و هیچ تهدیدی از افغانستان برای کشورهای همسایه نخواهد بود، اما با آنهم نگرانیها پابرجاست. تاجیکستان نگران نفوذ داعش از افغانستان و چین نگران جنبش اسلامی ترکستان شرقی است.
امامعلی رحمان اخیرا گفته است براساس اطلاعات استخبارات تاجیکستان، بیش از ۴۰ کمپ و مرکز آموزش تروریستها در ولایات شمالی افغانستان وجود دارد که بیش از شش هزار شبه نظامی را جای داده است. او به کشورهای منطقه پیشنهاد کرده یک کمربند امنیتی در اطراف افغانستان ایجاد شود.
امامعلی رحمان امروز هم به شی جینپینگ گفت تاجیکستان برای توسعه همه جانبه مشارکت راهبردی با چین، مصمم است.
رئیس جمهور تاجیکستان روز جمعه، ۱۵ دلو به دعوت همتای چینی خود به منظور شرکت در بازیهای المپیک زمستانی وارد پکن شد.
