جان مارک، سفیر امریکا در تاجیکستان میگوید واشنگتن، چرخبالهای منتقل شده از افغانستان به کشورهای همسایه را به طالبان نمیدهد. پس از سقوط کابل، پیلوتهای افغان دهها چرخبال را به تاجیکستان و ازبکستان انتقال دادند. وزیر دفاع طالبان خواهان بازگرداندن این چرخبالها شده بود.
ملا یعقوب مجاهد، وزیر دفاع طالبان، تاجیکستان و ازبکستان را تهدید کرده بود در صورتیکه چرخبالهای افغانستان بازگردانده نشود، باید منتظر واکنش باشند.
مقامات طالبان تاکنون به اظهارات اخیر سفیر امریکا در تاجیکستان واکنشی نشان ندادهاند.
روحالله احمدزی، سخنگوی وزارت دفاع حکومت پیشین چندی قبل به افغانستان اینترنشنال گفت در روز ۱۵ اگست ۶۳ هواپیمای نظامی با ۶۰۰ پیلوت و منصوبین نیروهای هوایی به ازبکستان و تاجیکستان پرواز کرده بودند.
سفیر آمریکا در دوشنبه روز گذشته در یک کنفرانس مطبوعاتی گفت که ایالات متحده و تاجیکستان در مورد سرنوشت طیارهها و چرخبالهایی که در ماه آگست سال گذشته از افغانستان وارد تاجیکستان شدند، گفتگو کردهاند.
او از جزئیات این مذاکرات حرفی نزد، اما گفت «صحبت از چرخبالها و طیارههای نظامی است که پس از سقوط کابل، توسط پیلوتهای افغان وارد کشورهای همسایه شدند. آنها ۱۵۰ چرخبال نظامی هستند که توسط آمریکا به دولت سابق افغانستان اهدا شده بود.»
به گزارش خبرگزاری آسیا پلوس تاجیکستان، محمد ظاهر اغبر، سفیر افغانستان در دوشنبه قبلا تائید کرده است که تعدادی از چرخبالها به تاجیکستان تحویل داده شدهاند.
سیگار، اداره بازرس آمریکا برای بازسازی افغانستان هم اخیرا گزارش داد که ۱۶ چرخبال حکومت پیشین افغانستان که به اوکراین منتقل شده بود، به دولت ولودیمیر زلنسکی داده شده است.
