شماری از کارمندان و استادان مراکز تربیت معلم افغانستان با صبغتالله وصیل، معین وزارت معارف طالبان دیدار کردند. آنان در این دیدار با نگرانی از بیسرنوشتی خود، از طالبان خواستند در تصمیم خود برای حذف ادارات تربیت معلم تجدید نظر کنند.
وزارت معارف طالبان روز دوشنبه ۲۶ سرطان در خبرنامهای نوشت که کارمندان و استادان تربیت معلم در این دیدار خواهان ابقاء و تداوم کار مراکز تربیت معلم شدند.
فردین بهاوی به نمایندگی از استادان، ادارات تربیت معلم را «کانون کادر پروری برای وزارت معارف» خوانده و گفته تصمیم اخیر طالبان «تربیت کادرهای جدید را در بخش تربیت معلم مسلکی به کندی مواجه میسازد.»
نگرانی از بیسرنوشتی استادان و کارمندان تنقیص شده از دیگر موضوعات این دیدار بوده است.
بر اساس خبرنامه وزارت معارف طالبان، مولوی صبغتالله وصیل یک کمیته چهار نفره از استادان دارالمعلمین و مسئولین معینیت منابع و اداره وزارت معارف طالبان تشکیل داده تا تصمیمات گرفته شود.
روز دوشنبه ۱۹ سرطان اسنادی به افغانستان اینترنشنال رسید که نشان میدهند، طالبان واحدهای تشکیلاتی تربیت معلم را از ساختار وزارت معارف افغانستان حذف میکند.
وزارت معارف طالبان در توجیه این اقدام گفت ساختارهای ولایتی معینیت تربیت معلم، «بدون برنامه در ساختار تشکیلاتی وزارت فعالیت داشت که سالانه صدها میلیون افغانی از این رهگذر هزینه اداری، حفظ و مراقبت زیربناها، برق و معاشات کارمندان میگردید.»
وزارت معارف طالبان میگوید بنابر هدایت رئیسالوزرای طالبان مبنی بر حذف «ساختارهای مضاعف، موازی، ادارات غیر مؤثر و غیرضروری»، تصمیم به حذف ساختارهای ولایتی مراکز تربیت معلم گرفته شده است.
گفته شده با حذف مراکز ادارات تربیت معلم، دستکم چهار هزار نفر شغل خود را از دست خواهند داد.
طالبان وعده دادهاند که کارمندان این ادارات را در سایر بخشهای وزارت معارف به کار گیرند.
