اوکرایني چارواکي وايي؛ د اوکراین په ختیځ کې د کوستیانتینیوکا په ښار کې پر یوه مارکېټ د روسیې په برید کې لږ تر لږه ۱۷ کسان وژل شوي او ۳۲ نور ټپیان دي. دا برید کیف ته د امریکا د بهرنیو وزیر انټوني بلینکن له سفر سره هممهاله شوی دی.
د اوکراین د ولسمشرۍ ماڼۍ د دفتر چارواکو په خواله رسنیو کې داسې انځورونه خپاره کړي، چې د خلکو یوه ډله په ځمکه پراته او ځینې نور په تیښته دي.
د اوکراین ولسمشر ولودیمیر زېلنسکي دا برید غندلی او ویلي یې دي چې روسیه باید ژر تر ژره ماته شي.
ښاغلي زیلینسکي په کیف کې یوې خبري غونډې ته وویل، چې پر دغه ښار د روسیې برید قصدي و. د کوستیانتینیوکا ښار چې د ۲۰۲۲ کال د فېبرورۍ په میاشت کې پر اوکراین د روسیې تر برید مخکې شاوخوا ۷۰ زره نفوس درلود، له ویجاړ شوي ښار باخموت څخه په ۳۰ کیلومترۍ کې پروت دی، چې په تېرو څو میاشتو کې د دواړو لورو ترمنځ د سختو نښتو مرکز دی.
دا ښار د اوکراین له پلازمینې کیف څخه شاوخوا ۵۶۰ کیلومتره لېرې دی، چې ښاغلی بلینکن یې لیدنه کوي.
پر دغه ښار د روسیې د چهارشنبې برید د اوکراین پر ختیځو ښارونو د بریدونو له لړۍ وروسته کېږي، چې په ترڅ کې یې ښاري بنسټونه په نښه شوي دي.
تر دې برید څو ساعته مخکې د کیف او د اودیسا جنوبي سیمې په هوايي بریدونو کې په نښه شوې وې. اوکرایني چارواکو ویلي چې یوازې په اودیسا کې یو کس وژل شوی او په کیف کې د مرګ ژوبلې راپور نه دی ورکړل شوی.
