پاکستاني طالبان: په خېبر پښتونخوا کې مو د دوو امنيتي پوستو په نيولو سره شپږ سرتېري وژلي دي
پاکستاني رسنیو خبر ورکړی، چې پاکستاني وسله والو طالبانو په خېبر پښتونخوا صوبه کې دوه امنیتي پوستې نیولي دي.
پاکستاني رسنیو خبر ورکړی، چې پاکستاني وسله والو طالبانو په خېبر پښتونخوا صوبه کې دوه امنیتي پوستې نیولي دي.
د دې ډلې ویاند محمد خراساني د چهارشنبې په ورځ (د وږي ۱۵مه) ادعا وکړه، چې د دغه برید په پایله کې شپږ دولتي سرتېري وژل شوي دي.
د راپورونو له مخې؛ دغه دوه پوستې د افغانستان پولې ته څېرمه په "جنجریت غره" سیمه کې موقعیت لري.
د تحریک طالبان پاکستان (ټي، ټي، پي) ویاند ویلي دي، چې د دغې ډلې وسله والو په دغو دوو پوستو کې د امنیتي ځواکونو پوځي تجهیزات هم نیولي دي.
تر اوسه د پاکستان امنیتي چارواکو د تحریک طالبان د دغې ادعا په اړه کوم رسمي غبرګون نه دی ښودلی.
د تېر کال له مني راهیسې کله چې تحریک طالبان پاکستان د دغه هېواد له حکومت سره اوربند پای ته ورساوه، د یادې ډلې بریدونه ډېر شوي دي.
بل خوا د پاکستان په شمالي وزیرستان کې امنیتي سرچینو د پولې د اغزن تار د پرې کولو په مهال د تحریک طالبان پاکستان د څلورو وسله والو د وژل کېدو خبر ورکړی دی.
