په اسلام اباد کې یو شمېر افغانو معترضو مېرمنو خبرداری ورکړی، که ملګري ملتونه د تمنا زریاب پریاني انساني غوښتنو ته پام ونه کړي، دوی به هم د نه خوړو په اعتصاب لاس پورې کړي.
تمنا په جرمني کې د نه خوړو په اعتصاب سره هڅه کوي، چې په افغانستان کې جنسیتي تبعیض په رسمیت وپېژندل شي.
د افغانو ښځو پر وړاندې د طالبانو د سیاستونو په اعتراض کې د تمنا پریاني د نه خوړو اعتصاب اوومې ورځې ته وغځېد.
په پاکستان کې د بشري حقونو د فعالانو یوې ډلې او د افغان ښځو د معترض غورځنګ غړیو د چهارشنبې په ورځ د یو پرېکړه لیک په خپرولو سره له ملګرو ملتونو وغوښتل، چې د تمنا او د هغې د نورو "ملګرو" غوښتنو ته پام وکړي، چې د نه خوړو په اعتصاب بوختې دي.
دوی وایي، که دغه معترضې مېرمنې له هرې ستونزې سره مخ شي، نو نړۍواله ټولنه، ملګري ملتونه، اروپايي ټولنه او د امريکا او طالبانو په ګډون د نړۍ ټول هېوادونه به يې مسوول وي.
دغو مېرمنو د نړۍ د حکومتونو لهخوا په افغانستان کې د جنسیتي تبعیض په رسمیت پېژندنې لپاره د اغلې پریاني له غوښتنې څخه خپل ملاتړ څرګند کړ او له هغې سره یې د هغو کسانو د همغږۍ غوښتنه وکړه، چې عدالت غواړي.
دغو معترضو مېرمنو په افغانستان کې د طالبانو لهخوا د بشري حقونو پراخې سرغړونې او په ځانګړې توګه پر افغان ښځو د سختو بندیزونو لګولو ته په اشارې سره، له دغې ډلې سره د مالي مرستو د بندولو، د دې ډلې د چارواکو پر سفرونو د بندیزونو او له شرط پرته د سیاسي، او بشري حقونو د فعالانو او خبریالانو د خوشې کېدو غوښتنه هم وکړه.
دغو ښځو د افغانستان خلکو ته بلنه ورکړه چې د وژونکې چوپتیا پر ځای دې واټونو ته راووځي او د ښځو د مبارزې ملاتړ دې وکړي.
