د طالبانو تر واک لاندې ملي ټلویزیون اعلان وکړ، چې د دغې ډلې مشر د کورنیو چارو په وزارت کې د ۷۵ زره کسانو د ګومارلو امر کړی دی. دغه خبر د چهارشنبې په ورځ په فراه ولایت کې د دغې ډلې د نویو غړو د ګومارلو په درشل کې د یوه راپور په ترڅ کې خپور شو.
د ملي ټلویزیون د راپور له مخې، په فراه ولایت کې د طالبانو د کورنیو چارو وزارت مرستیال اسدالله حلیم د دغې ډلې د یوه پلاوي په مشرۍ په امنیتي ادارو کې د ۱۲۹۹ تنه نويو کسانو په ګومارلو بوخت دی.
دغه طالب چارواکي ملي ټلویزیون ته ویلي، چې دا ډله خپل بې برخلیکه پاتې شوي غړي په نویو بستونو ګوماري.
د نوموړي په خبره، د طالبانو د مشر هبت الله اخندزاده ته د منسوب فرمان له مخې، د دغې ډلې د کورنيو چارو په وزارت کې د نویو بستونو شمېر ٧٥ زرو ته رسېږي.
فراه ته د طالبانو د کورنیو چارو وزارت د استول شوي پلاوي د مالوماتو له مخې، د دې ډلې غړي او ملاتړي به په ټول افغانستان کې په نویو بستونو وګومارل شي.
د طالبانو د کورنیو چارو وزارت مرستیال زیاته کړه، چې د طالبانو د مشر په امر په دې وروستیو کې یو شمېر نوې ولسوالۍ جوړې شوې او په دغو ولسوالیو کې به یو شمېر نوي ځواکونه وګومارل شي.
له دې سره، طالبانو په کورنیو چارو وزارت کې د خپلو امنیتي ځواکونو د زیاتولو لپاره د خپلو مالي سرچینو په اړه څه نه دي ویلي.
سره له دې چې تراوسه د وسلهوالو طالبانو کره شمېره روښانه نهده؛ خو دغه ډله کله ناکله په خپلو پوځي لیکو کې د نویو سرتېرو د روزنې او ګومارنې خبر ورکوي.
