طالبانو په داسې حال تر ۲۹ زره ټنه ډېر نشهيي توکي سوځولي، چې سویلي ولایتونو کې په ښکاره د تریاکو کاروبار دوام لري. په کندهار کې د طالبانو سیمهییز چارواکي وايي، دغه نشهيي توکي يې د دوو کلونو په موده کې ضبط کړي او په تړاو یې ۴۳۹ کسان هم نیولي.
په کندهار کې د طالبانو د امنیه قوماندانۍ له لورې د چهار شنبې په ورځ د (وږي په ۱۵مه) ۲۹ زره ۳۸۹ کیلو ګرامه نشهيي توکي داسې مهال وسوځول شول، چې په دغه ولایت کې په ښکاره د نشهيي توکو کاروبار کېږي.
په کندهار کې د طالبانو د امنیه قوماندانۍ چارواکي وايي، په دغه نشهيي توکو کې هېروین، ښېښه، چرس، مورفین، ټابلېټ کا، الکولي مشروبات، اومان، اېف او د نشهيي توکو د جوړېدو لپاره نور کارېدونکي کیمیاوي توکي شامل دي؛ خو دغه نشهیي توکي د هغه مایع تریاکو څخه تولیدېږي، چې همدا اوس یې هم سویلي ولایتونو کې په ښکاره کارو بار کېږي.
د طالبانو په خبره، د دغو نشهيي توکو د کاروبار او کارولو په تور يې ۴۳۹ کسان نیولي او د طالبانو عدلي او قضايي ادارو ته یې سپارلي دي.
طالبانو په داسې مهال دغه نشهيي توکي له منځه وړي، چې د کندهار په ډېریو ولسوالیو کې د تریاکو د کاروبار لپاره ځانګړي بازارونه جوړ شوي او هره ورځ په کې د ټنونو تریاکو پېر او پلور په ښکاره ترسره کېږي.
د طالبانو مشر ملا هبت الله پر افغانستان د طالبانو تر واکمنېدو څو میاشتې وروسته د نشهيي توکو پر کښت او کارو بار د بندیز فرمان صادر کړ، د دغه فرمان تر صادرېدو وروسته په افغانستان کې د نشهيي توکو د کښت کچه د پام وړ ټيټه شوې؛ خو د تریاکو پېر او پلور په ازاد ډول کېږي.
