د طالبانو د کورنیو چارو وزیر سراج الدین حقاني، په بامیان کې غونډې ته په وینا کې له محمد محقق او کریم خلیلي وغوښتل چې افغانستان ته ستانه شي. خو محمد محقق یې په ځواب کې وايي، چې د افغانستان بنسټیزې ستونزې حل نه شي په داسې ساده بلنو نه ستنېږي.
سراج الدین حقاني پرون مرکزي ولایت بامیان کې یوې غونډې ته وویل: «د استاد محقق صیب او کریم خلیلي صیب په څېر مشران چې په بهر کې دي موږ دا ورته وایو چې دا ښه کار نه دی، تاسو خپل قوم او ملت لرئ، راشئ د یوه مشر په څېر په خپل هېواد کې ژوند وکړئ.»
د نوموړي په خبره، په افغانستان کې نور هزاره مشران له درنښت ډک ژوند لري او کریم خلیلي او محمد محقق به هم خپل هېواد ته په ستنېدو سره نور محترم شي.
حقاني زیاته کړه چې دا کسان به افغانسان ته د ستنېدو په صورت کې خپل قوم ته د سولې پیغام ور کړي او په افغانستان کې به یووالی ټینګ کړي.
خو د ښاغلي حقاني په ځواب کې د وحدت ګوند مشر محمد محقق وايي، په دې ساده بلنو افغانستان ته نشي ستنېدلی.
نوموړی له افغانستان انټرنشنل سره په خبرو کې د سراج الدین حقاني بلنه کوم نوی وړاندیز ونه باله او زیاته یې کړه، چې دا بلنې د افغانستان ستونزې حلولی نه شي.
د طالبانو د کورنیو چارو وزیر په داسې حال له دې دوو سیاسي مشرانو افغانستان ته د ستنېدو هیله لري چې ویل کېږي دې ډلې پر پخواني ولسمشر حامد کرزي له بهرنیو چارواکو یا خلکو سره د لیدنو په برخه کې نوي قیودات لګولي دی.
