امریکا اوکراین ته د ۶۰۰ میلیونه ډالرو په ارزښت پوځي تجهیزات ورکوي
له کېیف سره د واشنګټن د پوځي مرستو پر دوام، د پنټاګون ویاند مرستیالې اوکراین ته د ۶۰ میلیونه ډالرو په ارزښت د امریکا د پوځي مرستو د نوې کڅوړې د ځانګړې کېدو خبر ورکړ.
له کېیف سره د واشنګټن د پوځي مرستو پر دوام، د پنټاګون ویاند مرستیالې اوکراین ته د ۶۰ میلیونه ډالرو په ارزښت د امریکا د پوځي مرستو د نوې کڅوړې د ځانګړې کېدو خبر ورکړ.
د هغې په وینا، په نویو مرستو کې د هوايي دفاع تجهیزات او بېلابېل نور مهمات شامل دي.
نوموړې د پنجشنبې په ورځ په یوه خبري غونډه کې وویل، د امریکا دفاع وزارت اوکراین ته د پوځي مرستو یوه نوې کڅوړه ځانګړې کړه او د ۶۰۰ میلیونه ډالرو په دغې کڅوړه کې د اوکراین د هوایی دفاع د پیاوړتیا لپاره تجهیزات، د توپونو مهمات او نور توکي شامل دي.
د راپورونو له مخې، په دغې کڅوړه کې به د هېمارس مرمۍ، ۱۰۵ ملي متري مرمۍ د برېښنایي جګړې تجهیزات او د ماین پاکول شامل وي.
د اوکراین د دفاع وزارت تېره میاشت اعلان وکړ، چې د دغه هېواد خاوره اوس د ځمکې پر مخ تر ټولو زیات ماینونه لري او د کییف پوځ هم د بشري ځواک او ماین پاکولو تجهیزاتو له سخت کمښت سره مخامخ دی.
پنټاګون وايي، امریکا د ۲۰۲۲ کال له فبرورۍ راهیسې له اوکراین سره ۴۴.۴ میلیارده ډالره پوځي مرسته کړې ده.
د امريکا د بهرنيو چارو وزير انټوني بلېنکن د چهار شنبې په ورځ د ملګرو ملتونو د عمومي اسمبلۍ د غونډې په څنډه کې د دواړو هېوادونو د همغږۍ د زياتولو په موخه کيیف ته لاړ او د اوکراين له ولسمشر ولاديمير زېلېنسکي سره يې په ليدنه کې د روسیې پر وړاندې د دغه هېواد د ځوابي برید د پرمختګ ستاينه وکړه.
مسکو وايي، واشنګټن غواړي چې د اوکراین د پوځ تمویل ته دوام ورکړي چې روانه جګړه تر وروستي اوکرایني پورې وغځوي.
د کرملېن ویاند دیمیټري پېسکوف په دې وروستیو کې ویلي، چې له کییف سره د امریکا مرستې به د روسیې د پوځي ځانګړو عملیاتو پر بهیر اغېز ونه کړي.
روسیه پر اوکرایین پوځي یرغل، ځانګړی عملیات بولي.
