پاکستان په اسلام اباد د طالبانو سفیر ته اعتراض کړی، چې پر چترال د برید پرمهال پاکستاني طالبانو د افغانستان خاوره کارولې ده.
پاکستاني طالبانو ویلي، د چترال برید کې یې نهه پاکستاني پوځیان وژلي او د پوځ دوه پوستې یې نیولي دي. د پاکستان پوځ بیا وسلوالو پرضد په سیمه کې عملیات وکړل.
د پاکستان د بهرنیو چارو وزارت وايي، په اسلام اباد کې یې د طالبانو سفیر احضار کړی چې پر دغه برید او دغه راز د تورخم پر پوله د جګړې په اړه د پاکستان "سخت اعتراض" ورته څرګند کړي.
د خيبر پښتونخوا ايالت په چترال سيمه کې د پاکستاني پوځ پر پوستو د روانې اوونۍ د چهارشنبې په ورځ د پاکستاني طالبانو "پراخ" بريد د دغې ډلې يو له سختو بريدونو بلل شوى دى.
ویل شوي چې په دې عملیاتو کې د دغې ډلې سلګونو وسلوالو برخه اخیستې وه.
طالبانو ویلي چې په دغه برید کې یې نهه پاکستاني پوځیان وژلي او د پوځ دوه پوستې یې نیولې دي.
د پاکستان پوځ د خپلو څلورو سرتېرو د وژل کېدو پخلی کړی، خو وايي، د پاکستاني پوځ په ځوابي برید کې لږ تر لږه ۱۳ وسله وال وژل شوي دي.
د پاکستاني پوځ په خبرپاڼه کې چې تېره چهارشنبه سهار خپره شوه، ویل شوي چې دغو وسلوالو د افغانستان د نورستان او کونړ ولایتونو له سیمو په دې عملیاتو کې برخه اخیستې وه او په کابل کې یې له طالبانو سره پر دې موضوع خبرې وکړې.
خو د طالبانو د حکومت ویاند ذبیح الله مجاهد د پاکستاني چارواکو دا ادعا بې ځایه بللې او وايي، د پاکستاني طالبانو وسلهوال برید د افغانستان له خاورې په ګټه اخیستو نه دی شوی.