د خوړو نړیوال سازمان وایي چې که په افغانستان کې زیانمنو خلکو ته مرستې ونه رسېږي، د دې هېواد میلیونونه وګړي به په راروان ژمي کې خپلو سیمو پرېښودو ته اړ شي. دغه سازمان وايي که سږ کال ژمی له اړو خلکو سره مرستې و نه شي نو ناورين به رامنځته شي.
د دې سازمان د کاناډا څانګې پرون پر خپله ټویټر پاڼه کې د افغانستان لپاره د دې پروګرام د عملیاتي مشرې «هسیو وي لي» د یوه پیغام په خپرولو سره ویلي چې د افغانستان میلیونونه وګړي د راروان سخت ژمي لپاره چمتووالی نه لري.
هغې له یو شمیر مرسته کوونکو هېوادونو وغوښتل، چې که هر څومره ژر کېدای شي د خوړو له نړیوال پروګرام سره دې د یو میلیارد ډالرو مرسته وکړي چې دوی وکولای شي په افغانستان کې ۲۱ میلیونه زیانمنو او اړو خلکو ته بشري مرستې ورسوي.
د ملګرو ملتونو د بشري مرستو د همغږۍ دفتر د زمري میاشتې په وروستیو کې په افغانستان کې د ملګرو ملتونو د مرستو په بودیجه کې د ۱.۳ میلیارده ډالرو د کمښت خبر ورکړ.
دغې ادارې خبرداری ورکړی چې د روان کال ژمی به ډیر سخت وي چې به وينا یې د بودیجې کموالی به زیانمنې افغانې کورنۍ له لوږې، ناروغۍ او آن مرګ سره مخ کړي.
