د طالبانو د عامې روغتیا وزارت چارواکي په پلازمېنه کابل کې د مور او ماشوم د یوه روغتون د پرانیستلو خبر ورکوي. د دغه وزارت سرپرست قلندر عباد وايي هڅه يې داده چې د مور او ماشوم د مړينې کچې راټيټه کړي.
د عامې روغتیا وزارت سرپرست قلندر عباد د دغه روغتون د پرانیستې په مراسمو کې ویلي چې د یاد روغتون جوړېدل د میندو او ماشومانو د مړینې د کچې په کمولو کې اغېزمن رول لوبولی شي.
هغه زياته کړه، چې په هېواد کې د ميندو او ماشومانو د مړينې کچه راټيټه شوې او په روان کال کې په ټول هېواد کې له سلو زرو ماشومانو څخه ٢٥٥ يې د زېږون پر مهال مړه شوي دي.
د قلندر عباد په خبره، د " مور او ماشوم " دغه روغتون د "بیات بنیاد" په همکارۍ د "اندراګاندي" روغتون په انګړ کې جوړ شوی چې په یوه وخت کې د ۸۴ میندو او ماشومانو د بستر کیدو او درملنې وړتیا لري.
د بیات بنسټ مشر احسان الله بیات وايي:«د دغه روغتون په جوړولو ۲۹۶ میلیونه افغانۍ لګښت راغلی او دوی هڅه کوي چې د دغه روغتون چارې په بېلابېلو څانګو کې ګړندۍ کړي.»
دغه روغتون په کابل کې په داسې حال کې جوړېږي، چې د طالبانو د واکمنۍ پر مهال د هېواد د بېوزلۍ او بېکارۍ کچه زیاته شوې او د نورو برخو ترڅنګ روغتيايي سکتور ته هم زيان اوښتى، په هیواد کې په بېلابېلو ناروغيو د ماشومانو اخته کیدل او د میندو مړینه زیاته شوې ده.
