له نن څخه دوه ویشت کاله وړاندې د سپټمبر په ۱۱مه نېټه د امریکا په نیویارک کې بریدونه وشول، چې نېږدې ۳۰۰۰ کسان پکې ووژل شول. له دې پېښې وروسته د امریکا ولسمشر اعلان وکړ، چې یاده پېښه القاعده شبکې کړې ده.
ټاکل شوې ده، چې نن به په امریکا کې امریکايي چارواکي په بېلابېلو غونډو کې د یادې پېښې یاد غونډې وکړي.
د سپټمبر د ۱۱مې د پېښې په مناسبت به د امریکا ولسمشر جوبایډن به په الاسکا کې یوې غونډې ته وینا کوي؛ په دې غونډه کې به د مرستندویه ادارو د غړو په ګډون سرتېري او د قربانیانو کورنۍ شاملې وي.
ویل کیږي چې په دې غونډه کې به له ولسمشر بایډن سره د هغه مېرمن جېل بایډن او د دفاع وزیر لوېډ اسټن هم ګډون کوي.
په ورته وخت کې به د امریکا د ولسمشر مرستیاله کماله هرېس په پېنسلوانیا کې د دغې پېښې د دوه ویشتمې کلیزې په مناسبت په جوړه شوې غونډه کې ګډون کوي.
دغه غونډه د پېنسلوانیا په هغه سیمه کې جوړیږي، چېرې چې د سپټمبر د ۱۱مې د پېښې درېیمه الوتکه لوېدلې وه.
د سپټمبر د ۱۱مې نېټې له خونړۍ پېښې وروسته؛ امریکا له طالبانو وغوښتل چې د القاعدې مشر اسامه بن لادین ور ورسپاري، خو د طالبانو مشر ملا محمد عمر یې له ورکړې انکار وکړ، چې له امله یې د امریکا په مشرۍ ناټو پر افغانستان برید وکړ او د طالبانو واکمني یې ړنګه کړه.
په ټولنیزو شبکو کې ګڼو امریکايي فعالانو د دغې ورځې یادونه کړې او دغه ورځ یې د امریکا لپاره یوه توره ورځ یاده کړې ده.
تر دې مخکې د جنوبي کوریا لوړپوړو چارواکو ویلي وو، چې د شمالي کوریا مشر کیم جونګ اون له ولادیمیر پوتین سره د لیدو لپاره روسیې ته تللی دی.
ویل کیږي چې ښاغلی کیم د دوشنبې په ماښام (د وږي ۲۰مه) د یوه ځانګړي زغره وال ریل ګاډي په واسطه د روسیې لېرې ختیځ کې د خسان سیمې ته روان شوي دي.
په همدې حال کې داسې رپوټونه ورکول کېږي، چې ښاغلی پوتین به هم د سې شنبې په ورځ د روسیې لېرې ختیځې سیمې ته لاړ شي چې په دې سیمه کې له ښاغلي کیم سره وګوري.
ویل شوي چې د دواړو مشرانو د خبرو موضوع به پر پوځي همکاریو او د وسلو د استولو پر هوکړې متمرکزه وي.
د رویټرز خبري اژانس د راپور له مخې؛ امریکايي چارواکو ویلي دي چې د اوکراین په جګړه کې روسیې ته د وسلو مرسته ورکول به د شمالي کوریا لپاره یوه لویه تېروتنه وي.
شمالي کوریا یو له هغو هېوادونو څخه دی، چې په ښکاره یې پر اوکراین د روسیې د پوځي برید ملاتړ کړی دی.
د شمالي کوریا د مشر په دې سفر کې د هغه امنیتي تدابیر د ډېرو رسنیو پام ځانته اړولی دی. د دغه سفر د محرمیت له امله تر اوسه د هغه د سفر په اړه کوم خبر یا رسمي اعلان نه دی شوی.
هغه څه چې تر دې دمه په دې اړه خپاره شوي اکثره د هغو معلوماتو پر بنسټ دي، چې د سویلي کوریا چارواکو د نامعلومو سرچینو په توګه د هېواد رسنیو ته ورکړي.
د ښاغلي کیم د دغه سفر پر مهال سخت امنیتي تدابیر نیول شوي دي
له بلې خوا جاپاني رسنیو ویلي، چې امنیتي تدابیر سخت شوي او د روسیې په خسان ښار کې د اورګاډي اصلي تم ځای د ترمیم په حال کې دی، ځکه چې د شمالي کوریا مشر به له هغه ځایه روسیې ته ننوځي.
د شمالي کوریا مشر له ندرت سره بهر ته سفر کوي. هرکله چې هغه سفر کوي، د هغه سفر د امنیتي رازونو څخه ډک پاتې کیږي.
