د طالبانو حکومت د لرغونپوهنې اداره وايي، د لوګر په مس عینک کان او د کابل په شېوکیو کې یې موندلي اتیا تاریخي اثار کابل موزیم ته وسپارل. د باختر اژانس د چارشنبې ورځې د راپور له مخې دا اثار په کوشاني او ساساني دورو پورې تړاو لري.
په دې اثارو کې چاټۍ، منګي او تېلي څراغونه شامل دي.
په وروستیو کې د طالبانو حکومت دفاع وزارت وویل، چې بهر ته یې د ۲۷ میلیون ډالرو په ارزښت د تاریخي توکو د قاچاق مخه نیولې ده.
دا لرغونتونکي په بامیان کې موندل شوي او څو کسان یې د قاچاق په تور نیول شوي دي.
د مسک عینک کان استخراج د تاریخي او لرغونو اثارو د موجودیت په دلیل لا پیل شوی نه دی.
طالبانو په وروستیو کې ویلي، د دې لپاره چې د دې سیمې تاریخي اثار زیانمن نه شي، یوه بدیله طرحه یې چینايي شرکت ته وړاندې کړې ده.
یوه چینايي شرکت په دغه کان کې د مس د اېستلو تړون لاسلیک کړی دی.
