په کراچۍ ښار کې د یوې دیني مدرسې مشر، ناپېژاندو وسلهوالو په ډزو وژلی
د کراچۍ ښار په ګلستان جوهر سیمه کې بېګاه شپه د (سېپټمبر په ۱۲مه) د جامعه اسلاميه ابوبکر په نوم د یوې دیني مدرسې مشر مولانا ضیاء الرحمن نامعلومو وسلهوالو په ډزو وژلی دی.
د کراچۍ ښار په ګلستان جوهر سیمه کې بېګاه شپه د (سېپټمبر په ۱۲مه) د جامعه اسلاميه ابوبکر په نوم د یوې دیني مدرسې مشر مولانا ضیاء الرحمن نامعلومو وسلهوالو په ډزو وژلی دی.
د سیمې د پولیسو مشر عرفان بهادر وايي، په دې اړه يې پلټنې پيل کړې.
د نوموړي په وینا، د مولانا ضیاالرحمان په وژلو کې دوه ښکېل کسان په موټرسایکل سپاره وو.
تر دې دمه کومې وسلهوالې ډلې د دغې وژنې پړه نه ده منلې.
په دې وروستیو کې د پاکستان په ډېریو ښارونو کې د ناامنیو د ډېرېدو تر څنګ هدفي وژنو هم زور اخیستی دی.
پاکستانۍ پټې سرچينې وايي، لا هم د افغانستان خاوره د دوحې تړون خلاف د پاکستان پر ضد کارول کيږي. سرچينې وايي، «په ځلونو مو طالبانو سره د دواړو هيوادونو د ستونزو حل لپاره له ډيپلوماتیکو لارو هڅې کړې خو تر اوسه يې کومه مثبته پایله نه ده لرلې.»
هغه سرچينې چې نه غواړي هويت يې څرګند شي وايي، نور دوی په دې باور دي چې ډيپلوماتيکې هڅې پای ته رسیدلې او دوی به دا ځل نيغ په نیغه د خپلو مخو ترلاسته کلو لپاره «په افغانستان کې د ننه ځينې هدفونه په نښه کړي.»
سرچينې زیاتوي، دوی څو ځلې په کابل کې له طالبانو غوښتي چې په خپله خاوره کې دې پاکستاني طالبانو ته ځای نه ورکوي او هغوی دې له خپلې خاورې وشړي خو وای «تر اوسه پورې دا کار نه دی شوی.»
دغه پټې سرچينې وايي «اوس هم ټي ټي پي د افغانستان له خاورې پر پاکستان بریدونه کوي.»
د سرچينو په خبره که په کابل کې د طالبانو حکومت د ټي ټي پي په له منځه وړلو کې ګام وانخلي نو دوی به خپله لاس په کار شي او «هغلته به بریدونه وکړي چیرته چې د ټي ټي پي مرکزونه او پناځایونه دي.»
د دغو سرچېنو اشاره افغانستان ته وه خو دا يې نه دي ويلي چې د افغانستان په کومه سیمه کې؟
سرچينې وړاندې وايي دوی به «په افغانستان کې ټي ټي پي په نښه کړي او هم به د هغوی په ملاتړو ته ګوزارونه وکړي.»
طالبانو تېره ورځ د پاکستان د بهرنیو چارو وزارت د وياندې څرګندونو ته په غبرګون کې ويلي چې «پاکستان په خپل هيواد کې امن نه شي راوستلی او پړه يې په افغانستان اچوي.»
د طالبانو حکومت د ویاند مرستیال هم ويلي چې دوی د «خپل امن ساتلو مسوليت لري او د بل امن د هغوی خپل کار دی.»
له تېر یوه کال راهیسې د طالبانو او پاکستاني حکومت تر منځ د سرحدي او داخلي مسلو پر سر ناندرۍ روانې دي خو دا ځل داسې ښکاري چې د پاکستان لنډمهالي حکومت چارواکي په دغه ګام کې جدي دي.
ډنمارک د روسیې د روغتیا وزیر مرستیال اولګ سالاګای ته اجازه ورنه کړه، چې دغه هېواد ته داخل شي. دغه روسي چارواکي پلان درلود، چې په کوپنهاګن کې د روغتیا د نړۍوال سازمان په غونډه کې برخه واخلي.
د روغتیا د نړۍوال سازمان غونډه د سې شنبې په ورځ (د وږي ۲۱مه) د دوو ورځو لپاره په کوپنهاګن کې ترسره شوې ده.
د رشیا ټوډي خبري شبکې په کوپنهاګن کې د روسي ډېپلوماټانو په حواله لیکلي دي: "د سپټمبر له ۱۲مې تر ۱۴مې د روغتیا د نړۍوال سازمان سیمه ییزه غونډه په کوپنهاګن کې جوړیږي. تمه وه چې د روسیې د روغتیا مرستیال وزیر هم په دې غونډه کې ګډون وکړي، خو په هوایي ډګر کې یې ډنمارک ته د ننوتو مخه ونیول شوه".
په کوپنهاګن کې د روسیې سفارت د ډنمارک د حکومت دغه کړنه «بې شرمانه» بللې ده.
روسیې ټینګار کړی، چې د دې پېښې په اړه د ډنمارک له چارواکو څخه د وضاحت او بخښنې په لټه کې دی.
ډنمارک د شمالي اتلانتیک د تړون د سازمان، (ناټو) غړی دی او په اوکراین د روسیې له یرغل وروسته یې له کیف څخه پوځي ملاټړ کړی دی.
د ختیځې لیبیا چارواکي وايي، چې په لیبیا کې د سختو بارانونو له امله سیلابونه راوتلي، چې تر اوسه پکې ۲۴۵۰ کسان مړه شوي او له ۱۰۰۰۰ زیات ورک شوي دي.
ټاسک نیوز د ختیځې لیبیا د لومړي وزیر اسامه حماد په حواله ویلي، چې د د دانیل په نوم د مدیتراني طوفان او سختونو بارانونو له امله د دغه هېواد په بېلابېلو سیمو کې سیلابونه راوتلي دي.
راپور زیاتوي، چې په جبل الاحضر، المارج او درنا کې تر دې مهال د ښځو او ماشومانو په ګډون ۲۴۰۰ تنه مړه شوي دي، په راپور کې راغلي چې د ژغورنې ډلې لا هم د یو شمېر خلکو په ژغورلو بوختې دي.
د دغه سیلابونو له امله ګڼو ودانیو ته هم زیان اوښتی، ځینې یې په بشپړ ډول له منځه تللي او ځینې یې نیمه ویجاړې شوي دي.
تېره ورځ د لیبیا لومړي وزیر اسامه حماد هم د پېښې ځای ته سفر کړی او د قربانیانو له یو شمېر کورنیو سره یې هم لیدلي دي.
نوموړي ویلي، چې د درنا په ساحلي ښار کې زرګونه انسانان لا هم ورک دي.
تر دا مهاله د سرې مياشتې ۲۰۸۴ کسانو مړينه تاييد خو زیاته کړې یې ده، چې د وژل شويو شمېر ښايي تر دې ډېرې شي.
د سره صلیب ویاند تیمر رمضان بیا ویلي، چې تر لسو زرو پورې کسان لادرکه دي چې مرستندويه ادارې یې د موندلو کوښښ کوي.
یاد سیلابونه په لیبیا کې په وروستیو لسو کلونو کې بې ساري ګڼل شوي او ویل کیږي، چې د اوبو اندازه تر لس فوټو پورې رسېدلي دي.
د افغانستان لپاره د امریکا د بهرنیو چارو وزارت ځانګړي استازي په افغانستان کې د داعش پر وړاندې د طالبانو جګړه جدي بللې او زیاته کړې یې ده، چې طالبانو د دغې ډلې اته قوماندانان له منځه وړي دي.
ټام وېسټ د سې شنبې په ورځ(د وږي ۲۱مه) په سټیمسن انسټیټیوټ کې وویل، چې طالبانو په افغانستان کې د داعش اته قومندانان وژلي او پر ملکي وګړو په ځانګړې توګه پر هزاره ګانو د داعش بریدونه کم شوي دي.
هغه زیاته کړه، چې دی نه غواړي د داعش پر فعالیتونو د طالبانو د مبارزې په اغېزو کې "مبالغه" وکړي، خو پر ملکي وګړو د داعش بریدونه د پخوا په څېر نه دي.
د ۲۰۰۱ کال د سپټمبر د یوولسمې له بریدونو یوه ورځ وروسته، چې القاعده پکې لاس درلود؛ امریکايي استازي په دغه مرکز کې له افغانستانه د امریکايي ځواکونو د وتلو او د هغې د اغېزو په اړه وینا وکړه.
د نوموړي په اند؛ تحریک طالبان پاکستان اوس په سیمه کې یو امنیتي ګواښ دی.
پاکستان پر افغان طالبانو تور پورې کړی، چې په افغانستان کې د مېشتو پاکستاني اورپکو د کنټرولولو توان نه لري.
په افغانستان کې واک ته د طالبانو له راتګ وروسته په دغه هېواد کې د تروريستي بريدونو ډېر والى د پاکستاني طالبانو د فعاليتونو او په افغانستان کې د هغوى د ازادو فعاليتونو له امله بلل شوى دى.
تر اوسه واشنګټن له طالبانو څخه د پاکستاني وسله والو د نفوذ او بریدونو د مخنیوي لپاره د اسلام اباد د غوښتنو په اړه دریځ نه دی روښانه کړی.
دغه راز په تېرو دوو کلونو کې واشنګټن له طالبانو او نورو وسله والو ډلو سره چې د سیمې د هېوادونو له پاره ګواښ بلل کېږي، د طالبانو پر اړیکو جدي انتقاد نه دی کړی.
د هند حکومت د یوې اعلامیې په خپرولو سره ویلي، چې تر دا مهاله یې له افغانستان سره نېږدې پنځوس زره ټنو غنمو، واکسینونو او نور روغتيايي توکو مرسته کړې ده.
اج تک خبري شبکې په خپل راپور کې ویلي، چې هند د ملګرو ملتونو د بشري حقونو د شورا په ۵۴مه غونډه کې چې پرون دوشنبه( د وږي ۲۰مه) په جینوا کې پیل شوه او لومړۍ برخه یې د افغانستان وضعیت ته ځانګړې شوې وه، د یوې اعلامیې په خپرولو سره ویلي، چې نېږدې ۲۰۰ ټنه واکسینونه او ۲۸ ټنه د طبیعي پېښو له زیانمنو شویو سره د لومړنیو توکو مرسته کړې ده.
په اعلامیه کې ویل شوي، چې هند په ډېره دقیقه او نېږدې بڼه د افغانستان وضعیت څاري او له دغه هېواد سره به خپلو بشري مرستو ته دوام ورکوي.
اعلامیه زیاتوي، چې له افغانستان سره د هند د مرستو یوه موخه په دغه هېواد کې بشري مرستې او د ثبات د رامنځته کېدا هیله ده.
د یادونې وړ ده، چې هند په تېرو شلو کلونو کې د افغانستان اسلامي جمهوري دولت یو له نېږدې همکارو هېوادونو څخه و، چې وخت ناوخت د دواړو لوریو پر اړیکو پاکستان خپله ناخوښي څرګنده کړې ده.
