د طالبانو د امربالمعروف ویاند د سه شنبې په ورځ اعلان وکړ، چې د دغه وزارت محتسبینو په بامیانو کې له سوداګرو غوښتي، چې تنګې او نازکې جامې چې د « افغاني فرهنګ او شریعت» خلاف دي بازارونو ته راوارد نه کړي.
هغوی له خلکو هم غوښتي، چې د دغه ډول جامو له اغوستلو ډډه وکړي.
د دغه وزارت په خبرپاڼه کې راغلي، چې په بامیانو کې د امربالمعروف محتسبینو ویلي چې د دغو جامو اغوستنه «د لویدیځ فرهنګ نه د تقلید ښکارندوی» کوي او له خلکو یې غوښتي چې «له دیني ارشاداتو » سره دې سمې جامې واغوندي.
طالبانو د پراخه جامو اغوستنه او د نارینه لپاره د خولۍ په سروونه د اسلام او افغانستان د فرهنګ غوره بېلګې ګڼي.
دغو محتسبینو د یکاولنګ ولسوالۍ او د بامیانو په چهاردهي سیمه کې له روغتیایي کلینیکه د څارنې پرمهال روغتیایي کارکوونکو ته یې د «ښځو لخوا د حجاب مراعتول»،«د نارینهو او ښځینهو د انتظارخونو جلاوالی» او « د پیغمبر په سنت د سیرت او صورت د برابرولو» امر کړی دی.
پر افغانستان د طالبانو له بیا واکمنېدو وروسته، دغې ډلې د امربالمعروف او نهی عن المنکر وزارت جوړ کړ، چې د ښځو او نارینهو شخصي مسلې وڅاري.
