د بشري حقونو فعالان وايي، د دغو نېونو موخه د هغو بې وزلو افغانانو ځورول دي چې له امنیتي وېرې او اقتصادي ستونزو له امله د طالبانو تر واک لاندې افغانستان ته نه شي ستنېدلای.
د پاکستان په کراچۍ ښار کې د افغان کډوالو د نیولو په دوام د پولیسو له لورې هغه افغان کډوال نیول کېږي، چې د ۱۹۹۰ کلونو راهیسې په پاکستان کې اوسېږي.
دغه هېواد د تېرو څو ورځو راهیسې د هغه افغان کډوالو د نیولو او افغانستان ته یې د لېږدولو عملیات پیل کړي، چې په پاکستان کې د اوسېدو قانونې اسناد ونه لري.
د پاکستان حکومت له لورې پولیسو ته امر شوی، چې په سند ایالت او د پاکستان په نورو ښارونو کې هغه افغانان ونیسی چې په پاکستان کې په نا قانونه توګه ژوند کوي.
د بشري حقونو فعالان وايي، د دغو نیونو موخه د هغو بې وزلو افغانانو ځورول دي چې له امنیتي وېرې او یا اقتصادي ستونزو له امله د طالبانو تر واک لاندې افغانستان ته نه شي ستنیدلای.
په کراچۍ کې د بشري حقونو فعاله او وکیله منیزه کاکړ چې افغانستان ته د افغان کډوالو او پناه غوښتونکو د شړلو د مخنیوي لپاره کار کوي ، پر خپلې اېکس «پخواني ټویټر» پاڼه لیکلي، «د افغان کډوالو ډلهییز نیول د دوی د نژادي پېژندګلوي پر بنسټ دي.»
اغلې کاکړ وايي، ډېری هغه کسان نیول شوي چې د پاکستان د حکومت له لوري ورته د کډوالۍ او په پاکستان کې د اوسېدو قانوني اسناد ورکول شوي دي.
نوموړې وايي:« د کډوالو د حقونو د خوندیتوب لپاره بېړني اقدام ته اړتیا ده.»
په ورته مهال د افغان کډوالو دغه مدافع وکیلې پر خپلې اېکس پاڼه د محمد هاشم په نوم د یوه افغان کډوال ویډیو هم خپره کړې، محمد هاشم - په دغې ویډیو کې وايي،« ډېري نور ملګري مې د پولیسو له لوري نیول شوي دي. په پاکستان کې د پاتې کېدو او کډوالۍ قانوني اسناد لرم؛ خو پولیسو مو اسناد اخیستي او د ناقانونه کډوالو په تور يي تورن کړي یو.»
په پاکستان کې افغان کډوال په داسي مهال د پولیسو له لوري نیول کېږي، چې د دغه هېواد لنډ مهالي لومړي وزیر څو ورځي وړاندې رسنیو ته ویلي و، چې د قانوني اسنادو نه لرونکي افغان کډوال باید خپل هېواد ته ستانه شي.
