ترکي رسنیو ویلي، د دغه هېواد امنیتي ځواکونو په ادرینه ولایت کې ۱۲۲ ناقانونه کډوال نیولي دي. د اناتولي خبري اژانس د سه شنبې په ورځ (د وږي په ۲۱مه ) راپور ورکړ، چې دغه کډوال د افغانستان، پاکستان، سوریې او عراق اوسېدونکي دي.
ویل کېږي دغو کډوالو هڅه کوله، چې یونان ته ننوځي؛ خو په شا تمبول شوي.
د اناتولي خبري اژانس د راپور له مخې، د دغو کډوالو له ډلې ځینو یې ادعا کړې چې د یونان امنیتي ځواکونو دوی وهلي او له خپل هېواده يې شړلي دي.
د نیول شویو کډوالو د برخلیک په اړه تر اوسه څه نه دي ویل شوي؛ خو ترکیې په تېرو اوونیو کې د افغانانو په ګډون ګڼ شمېر کډوال چې د اوسېدو اسناد يې نه لرل، نیولي او بېرته يې افغانستان ته لېږدولي دي.
د راپورونو له مخې، د روان کال له پیل راهیسې د ترکیې پولیسو د دغه هېواد په بېلابېلو ښارونو کې څه باندې څلور زره افغان کډوال نیولي او بېرته یې افغانستان ته استولي دي.
وروسته له هغې چې طالبان پر افغانستان واکمن شول، زرګونو افغانانو له ایران او ترکیې اروپا ته د کدوالۍ لاره خپله کړې ده.
