د پاکستان د ټاکنو کمېسون: داسې ښکارې چې سرپرست حکومت د عمران خان د دوښمنانو ملاتړ کوي

دغه کمېسیون د چارشنبې په ورځ په خپل لیک کې زیاته کړې ده: «داسې ښکاري چې سرپرست حکومت د قیدي پخواني لومړي وزیر عمران خان له مخالفانو سره همغاړی دی.»

خو د سرپرست حکومت د اطلاعاتو وزیر مرتضا سولنګي د کمېسون دا اندېښنه ردوي او وايي، په دې سیالۍ کې له چا سره دلچسپي نه لري.

نوموړي رویټرز ته په پیغام کې ویلي چې سرپرست حکومت به ټولو ګوندونو ته د یو شان اسانتیاوو برابرولو کې له کمېسون سره همکاري وکړي.

خو د ټاکنو کمېسون دا لیک پر حکومت یوه نادره رسمي ملامتیا اچوي.

په پاکستان کې چې د ټاکنو پایلې هم خورا کمې منلل کېږي، دا لیک د دې بهیر باور نور هم زیانمنوي.

د پاکستان د ولسمشر عارف علوي د پروني حکم له مخې د نومبر پر شپږمه یا نږدې دوه میاشتې وروسته په دغه هېواد کې د لنډمهالی حکومت په سرپرستۍ ټولټاکنې کېږي.

په پاکستان کې سرپرست یا لنډمهالي حکومت تېره میاشت د پارلمان د پنځه کلنې مودې تر بشپړېدو وروسته واک ترلاسه کړ.

د لنډمهالي لومړي وزیر انوارالحق کاکړ په مشرۍ د دې حکومت یو مسوولیت دا دی چې تر راتلونکو دریو میاشتو یې په سرپرستۍ بې پرې ټاکنې وشي.

انوارالحق کاکړ هم د داسې ګوند غړی دی چې د عمران خان پرضد ټلواله کې شریک و او د دې ټلوالې د تر ټولو مهم ګوند له مشر او پخواني لومړي وزیر شهباز شریف نه یې واک ترلاسه کړ.

دغې دوولس ګوندي ټلوالې عمران خان هم له واک لرې کړی و.