د کډوالو نړۍواله اداره له ګاونډیو هېوادونو افغانستان ته د راستنېدونکو کډوالو وضعیت د اندېښنې وړ بولي.
د کډوالو نړۍوال سازمان له ګاونډیو هېوادونو د افغان کډوالو د جبري ستنېدو په غبرګون ویلي، په افغانستان کې د دغو کډوالو وضعیت د اندیښنې وړ دی.
دغه سازمان د چهارشنبې په ورځ په خپله اېکس پاڼه کې لیکلي، چې دغه کډوال د بېکورۍ سربېره په افغانستان کې د بېکارۍ او بېوزلۍ له ستونزو سره هم مخامخ دي.
ویل کېږي، چې یوازې د روان میلادي کال په اګسټ میاشت کې څه د پاسه ۵۰ زره افغان کډوال راستانه کړای شوي چې پر دغو کډوالو نغدې پیسې، خوراکي توکي او د کور اړین توکي وېشل شوي دي.
د طالبانو د کډوالو او راستنېدونکو چارو وزارت هم اعلان کړى، چې يوازې تېره اونۍ له ايران او پاکستانه شاوخوا دوه زره افغان کډوال هېواد ته راستانه شوي دي.
د کډوالو نړۍوال سازمان په داسې حال کې د دغو کډوالو د وضعيت په اړه خپله اندېښنه څرګندوي، چې مرستندويه سازمانونو په وار، وار افغانستان کې د بشري مرستو ته د اړمنو کسانو د شمېر د زياتوالي او هغو ته د مرستو رسولو لپاره د بودجې د کمښت خبردارى ورکړى دى.
په افغانستان کې د طالبانو له واکمنۍ سره ګاونډیو هېوادونو په ځانګړې توګه ایران او پاکستان ته د کډوالۍ کچه لوړه شوې او یو شمېر ځوانان ان د سرونو په بیه هم اروپا ته په ناقانونه لارو د تګ تکل کوي.
په همدې حال کې په افغانستان کې له شته ننګونو سره سره، د سیمې یو شمېر هېوادونه هم د افغان کډوالو د نیولو او له خپل هېواده یې په ایستلو او شړلو لاس پورې کوي.