د سند ایالت په جامشور ولسوالۍ کې د سکرو يو کان نړېدو له امله د يوې کورنۍ ۳ ځوانان راګیر شوي او د يوې اونۍ له تېرېدو وروسته هم نهدي راایستل شوي.
دغه کسان د خیبر پښتونخوا د کرمې ایجنسۍ اوسېدونکي وو، چې دوه په کې وروڼه او یو بل یې د تره زوی دی.
دغلته کان کېندونکي وایي، چې د کانونو ټېکهداران کان کېندونکي هغو کانونو ته بیایي چې هلته کېندنې ناقانونه او له ګواښونو سره ملې دي، دغه کان کېندونکي دا تور هم پورې کوي چې د کانونو ټېکهداران دغه چاره له حکومتي چارواکو په پټه ترسره کوي.
دمګړۍ د لاندې شویو کان کېندونکو د رایستلو چارې روانې دي؛ خو دغلته چارواکي وایي چې د لاندې شویو کان کېندونکو له را ایستلو وروسته به د دغې پېښې په اړه پلټنې کوي.
د پاکستان په خيبر پښتونخوا، بلوچستان او سند کې د سکرو په کانونو کې بيا، بيا دا ډول پېښې مخې ته راځي، چې تر دې مهاله ګڼ کان کېندونکي په کې مړه شوي دي؛ خو د پاکستان په سند صوبه کې دا لومړنۍ پېښه نهده تر دې وړاندې هم په همدغې سیمه کې ګڼې داسې پېښې شوې، چې ګڼ کان کېندونکي یې وژلي دي.
په کانونو کې ډېری پېښې په بلوچستان او خیبر پښتونخوا کې کېږي، چې له امله یې زیات وژل شوي کسان پښتانه او د خیبر پښتونخوا اوسېدونکي دي.