په بلوچستان کې استخباراتي ادارې وایي، هغه ترهګر یې وژلی چې د دغې صوبې په سترو ترهګریزو بریدونو کې ښکېل و.
د بلوچستان دغې ادارې ویلي، د هغو استخباراتي عملیاتو په پایله کې چې د مستونګ په سیمه کې یې کړي د کالعدم تنظیم یو مهم غړی یې وژلی دی.
دغه اداره وایي، چې دغه وسلهوال کس غلام الدین نومیږي چې په شعیب مشهور و او نوموړی په ۲۰۱۷ کال کې په هغه ځانمرګي برید هم تورن و، چې د جمیعت علما پر یوه مشر شوی و او له امله یې ګڼ کسان په کې وژل شوي وو.
دا رنګه هغه په ۲۰۱۶ کال کې هم د هغه ځانمرګي برید پلان چمتو کړی و، چې د کویټې په یوه روغتون شوی و او د ۵۴ تنو وکیلانو په ګډون اویا تنه په کې وژل شوي وو.
د بلوچستان د استخباراتو دغه اداره وایي، چې دوی په دغې صوبه کې د ترهګرو پر ضد د عملیاتو لړۍ ګړندۍ کړې او هڅه کوي، چې دغلته د ترهګرو ځالې له منځه یوسي؛ خو داسې ښکاري چې لا هم د بلوچستان په ګڼو سیمو کې امنیتي حالات خورا تریګلي دي او د نورو ترهګرو ډلو تر څنګ د بلوڅانو ازادي غوښتونکی غورځنګ هم دغلته د پوځ او امنیتي ځواکونو پر ضد د خرپ او ترپ جګړه روانه ساتلې ده.