د سالنګ لارې له تړل کېدو وروسته د پروان -شیبر پر لویه لار ګڼه ګوڼه ډېره شوې
د پروان يوه اوسېدونکي افغانستان انټرنشنل ته د یوې ویډیو په لېږلو سره ویلي، چې کابل ته د رسېدو لپاره يې له درېيو ساعتونو ډېر په ټرافيکي ګڼه ګوڼه کې تېر کړي دي.
د پروان يوه اوسېدونکي افغانستان انټرنشنل ته د یوې ویډیو په لېږلو سره ویلي، چې کابل ته د رسېدو لپاره يې له درېيو ساعتونو ډېر په ټرافيکي ګڼه ګوڼه کې تېر کړي دي.
دغه ښاريان وايي، چې د سالنګونو له تړل کېدو وروسته مسافر له نورو لارو د تګ راتګ لپاره کار اخلي؛ خو دغه لارې د زياتو موټرو د تګ راتګ وړتیا نه لري.
د ۸۰ کیلو مټرو په اوږدوالي د سالنګ د لویې لارې د بیارغونې او بنسټيز ترمیم په موخه دغه لار د وږي په نولسمه تر نامالومه مودې د ټرافیکو پر مخ تړل شوې، چې خلک یې له ډېرو ستونزو سره مخامخ کړي.
کابل مېشتو څو ورځې مخکې شکایت درلود، چې تر نامالومې مودې د سالنګ لارې د بندېدو له امله د خوراکي توکو بیې لوړې شوې دي.
د دغې لويې لارې د بيارغونې چارې دوو کورنيو شرکتونو ته سپارل شوې دي.
تر دې وړاندې د سالنګ لویې لارې د څار او ساتنې ادارې مسوولینو اعلان کړی و، چې د سړک جوړونې له امله تر یوې مودې پورې به دغه لار د ټرافیکو پر مخ تړلې وي.
له بلې خوا، د طالبانو د ټولګټو چارو وزارت ویلي و، چې کېدای شي د دغې لارې د کانکرېټ کولو چارې څو میاشتې وخت ونیسي.
د سالنګ لویه لار چې شمالي، شمال ختیځ او شمال لویدیځ ولایتونه له پلازمینې سره نښلوي، پخوا د افغانستان د پخواني ولسمشر حامد کرزي په وخت کې بیارغول شوې وه؛ خو په دې ورستيو کې دغه لویه لار د زياتو موټرو په ځانګړې توګه د بار وړونکو موټرو د تګ راتګ له امله د نورو لارو په څېر ويجاړه شوې ده.
د سالنګ لاره د منځنۍ اسیا او د پاکستان د کراچۍ بندر تر منځ یو له لنډو لارو څخه ده، چې اوسمهال پاکستاني سوداګر د خپلو مالونو د لېږد رالېږد لپاره ترې کار اخلي.
