د سویډن په مالمو ښار کې د نرښځیانو د حقونو د یوې افغان فعالې د نه خوړو اعتصاب ۷مې ورځې ته وغځید. مهره بارکزۍ، د نرښځیانو د حقونو فعالې تېره ورځ وویل، د سویډن له حکومته غواړي چې په افغانستان کې د نرښځیانو پر وړاندې جنسیتي توپیر په رسمیت وپېژني.
د مېرمن بارکزۍ په خبره، له افغانستانه سویډن ته د هغو نرښځیانو ایستل چې ژوند یې له ګواښ سره مخ دی، د هغې بله غوښتنه ده.
د هغې په وينا، په افغانستان کې ډېر نرښځیان د مرګ له ګواښ سره مخامخ دي.
اوسمهال زیات شمېر نرښځیان بې کوره دي، دوی ته دندې نه ورکول کېږي او ځینې یې د دوی کورنۍ یا د طالبانو لهخوا ګواښل شوي هم دي.
نوموړې زیاته کړه، چې د اوو ورځو په تېرېدو سره تراوسه هم د سويډن حکومت او د ملګرو ملتونو چارواکو د دې اعتراض ته پام نهدی کړی.
د مهرې بارکزۍ په وینا، په سویډن کې د بشري حقونو او د نرښځیانو د حقونو فعالانو هم د هغې اعتراض ته پام نهدی کړی.
د نرښځیانو د حقونو دغې افغان فعالې ویلي، چې له اوو ورځو وروسته یې روغتیايي حالت مخ په خرابېدو دی.
مهرې بارکزۍ د سېپټمبر په اوومه د جرمني په کولن ښار کې د تمنا زرياب پریاني او د بشري حقونو د يو شمېر نورو فعالانو د نه خوړو له اعتصاب اووه ورځې وروسته خپل اعتراض پيل کړ.
تمنا زریاب پرياني د سېپټمبر په دوولسمه وویل، چې د هغې د عدالت غوښتنې لومړی پړاو په بریالیتوب سره بشپړ شوی دی، ځکه چې هغې خپل پیغامونه د جرمني، متحده ایالاتو او ملګرو ملتونو ته رسولي دي.
میرمن پریاني د سېپټمبر په دولسمه اعلان وکړ، چې د ځینو اعتصاب کوونکو د خرابېدونکي روغتیایي وضعیت او د خپل اعتراض د تګلارې په پام کې نیولو سره به د نه خوړو اعتصاب مات کړي او له نورو فعالانو څخه هم غواړي چې د نه خوړو اعتصاب پای ته ورسوي.
