د ایران د بشري حقونو سازمان د لاریونونو په ترڅ کې د ۵۵۱ لاریون کوونکو د وژل کېدو او د ۲۲ نورو له شکمنې مړینې خبر ورکوي.
د دغه نوي راپور له مخې، دغه شمېر کسان د تېر کال د وږي له میاشتې راهیسې وژل شوي دي.
د ایران د اسلامي جمهوریت پر وړاندې د خلکو د انقلابي پاڅون په نوم د دغه هېواد د مذهبي پولیسو لهخوا د مهسا ژینا امیني له وژل کېدو سره پیل شوی و او د امنیتي ځواکونو لهخوا د سلګونو لاریون کوونکو د وژل کېدو قضیې تراوسه هم ترلاس لاندې دي.
د ایران د بشری حقوقو د سازمان مدیر محمود امیري مقدم د اسلامی جمهوریت د جنایتونو د مستند کولو پر اهمیت ټینګار وکړ او د لاریون کوونکو خونړي ځپل یې یو لوی، پلان شوی منظم جنایت او د بشریت پر وړاندې یې د جنایتونو یوه څرګنده بېلګه وبلله.
نوموړي په دغو جرمونو کې د ټولو ښکېلو کسانو، د علي خامنهیي او د اسلامي جمهوریت له مشرانو څخه نیولې تر ځپونکو سرتېرو پورې د ځواب ویلو غوښتنه وکړه.
د دغه سازمان د راپور له مخې، په دغه پاڅون کې د ۶۸ ماشومانو او ۴۹ ښځو په ګډون د لږ تر لږه ۵۵۱ اعتراض کوونکو وژل کېدل ثبت او تایید شوي دي.
ډېری لاریون کوونکي د وسلو او ډنډو پر مټ وژل شوي او د ایران د بشری حقوقو د سازمان په وینا د اسلامی جمهوریت رسمي ادارو د هغوی د وژلو د ردولو او د ناسمو مالوماتو په ورکولو سره د هغوی د وژل کېدو د خبرونو د تحریفولو لپاره هر ډول هڅه کړې ده.
د ایران د بشري حقونو د سازمان د نوي راپور له مخې، په لاریونونو کې وژل شوي کسان د ۲۶ بېلابېلو ولایتونو څخه وو؛ خو تر ټولو ډېر وژل شوي کسان د سیسټان او بلوچستان ولایت څخه وو.