زلنسکي د متحده ایالاتو کانګرس ته ځي
د امریکايي رسنیو د راپور له مخې، ټاکل شوې چې د اوکراین ولسمشر ولادیمیر زلنسکي به د روانې اونۍ د پنجشنبې په ورځ د امریکا د کانګرس له استازو سره وګوري.
د امریکايي رسنیو د راپور له مخې، ټاکل شوې چې د اوکراین ولسمشر ولادیمیر زلنسکي به د روانې اونۍ د پنجشنبې په ورځ د امریکا د کانګرس له استازو سره وګوري.
تر دې مخکې یوه امریکايي چارواکي ویلي و، چې ښایي ښاغلی زلنسکي به د امریکا له ولسمشر جوبایډن سره هم وګوري.
واشنګټن پوسټ راپور ورکړی، چې د اوکراین ولسمشر امریکا ته ځي.
وال سټریټ ژورنال هم خبر ورکړ، چې ولادیمیر زلنسکي به د امریکا د کانګرس له استازو سره وګوري.
د اوکراین رسمي سرچینو تر اوسه په دې اړه څه نه دي ویلي.
یوه امریکايي چارواکي رویټرز خبري اژانس ته ویلي، چې ولسمشر زلنسکي به په نیویارک کې د ملګرو ملتونو د عمومي اسمبلۍ په غونډه کې له ګډون وروسته واشنګټن ته ولاړ شي.
ټاکل شوې، چې د ملګرو ملتونو د عمومي اسمبلۍ غونډه د سېپټمبر په ۱۸ او ۱۹ په نیویارک کې جوړه شي.
امریکا ته د ښاغلي زلنسکي سفر په داسې حال کې کېږي، چې د هغه امریکایي انډول هڅه کوي د امریکا قانون جوړوونکي قانع کړي، چې له اوکراین سره د ۲۴ ملیارده ډالرو اضافي مرستې هوکړه وکړي.
د امریکا مشرانو جرګه د ډیموکراټانو په کنټرول کې ده؛ خو د دغه هېواد د استازیو مجلس اوکرایین ته د اضافي مرستو د استولو په اړه د ښاغلي بایډن د پریکړې په وړاندې مقاومت ښودلی دی.
