د ملګرو ملتونو سرمنشي انټونیو ګوترېش د ایران له ولسمشر ابراهیم رییسي سره وکتل او د افغانستان د کړکېچ په اړه یې ورسره خبرې اترې وکړې. د ګوترېش او رییسي ترمنځ دغه لیدنه په نیویارک ښار کې د ملګرو ملتونو د عمومي اسمبلۍ د غونډې په څنډه کې وشوه.
ویل کېږي، چې دواړو لوریو د افغانستان او یمن پر کړکېچونو بحث کړی دی.
د ملګرو ملتونو ویاند ویلي، چې ګوترېش او رئیسي په دې لیدنه کې د سیمهییزو اړیکو په اړه هم خبرې کړي.
د ملګرو ملتونو سرمنشي په ایران کې د بشري حقونو په تېره بیا د ښځو او نجونو د حقونو د مراعتولو په اړه د ایراني چارواکو د ډاډ غوښتنه هم وکړه.
د ملګرو ملتونو ۷۸مه عمومي غونډه نن سه شنبې د سېپټمبر ۱۹مه په نیویارک کې د ۱۹۳ هېوادونو د مشرانو په ګډون پیلیږي او د سېپټمبر تر ۲۶مې به دوام وکړي.
انټونیو ګوترېش تر دې غونډې مخکې ویلي و، چې د افغان ښځو او نجونو د حقونو په اړه بحث به د دغې غونډې د اجنډا په سر کې وي.
دا په داسې حال کې ده، چې طالبان د افغانستان تر واکمنۍ وروسته د ښځو او نجونو له حقونو څخه په پراخه او سیسټماټیکه توګه په سرغړونو تورن دي.
دغې ډلې د نجونو پر تعلیمي ژوند زیات محدودیتونه لګولي او د ښوونځيو، پوهنتونونو او نورو تعلیمي مرکزونو دروازې یې د هغوی لپاره تړلي دي.