د شاهرخ خان "جوان" فلم د لیدونکو له تود هرکلي سره مخ شوی او په ټوله نړۍ کې له ۱۰۳ میلیونو ډالرو ډېر پلورل شوی. له "پټان" وروسته په روان کال کې دا د دغه نامتو اداکار دویم لوړ عاید لرونکی فلم دی. "پټان" له ۱۳۰ میلیونه ډالرو څخه ډير عاید درلود.
په دې ورځو کې د "ګدر۲ " چې د سني ډیول په اداکارۍ جوړ شوی د ۸۲ میلیونه ډالرو په ګټلو سره دویم مقام لري.
"جوان فلم" د اټلي کمار په لاښوونه جوړ شوی و او شاهرخ خان پر یوه مهال د پلار او زوی په رول کې را څرګند شوی، د دغه فلم کیسه په هندي ټولنه کې د فساد د له منځه وړلو او عدالت غوښتني په اړه را څرخي.په روان کال کې به شاهرخ خان ډېر بوخت وي، ځکه د نوموړي د "ډونکي" په نوم د یو بل فلم د جوړولو چارې هم دوام لري او په راتلونکي کرېسمس کې به خپور شي.د دغه فلم لارښود راج کومار هېراني دی. راج کومار هېراني د "مونا بهایي" د سنجي دت په اداکارۍ، "پي کې" او "ټري اېډیټس" د عامر خان په ادارکارۍ او "سنجو" د رنبیر په اداکارۍ د مشهورو او ډېر عاید لرونکو فلمونو د جوړولو له امله د هند په سینما کې ډېر شهرت او نوم لري.
د امریکا د متحدو ایالتونو ولسمشر جو بایډن وايي، چې په ایران کې زنداني پنځه امریکايي وګړي له زندانه خوشې شول او ډېر ژر به له خپلو کورنیو سره یو ځای شي.
سپینې ماڼۍ نن دوشنبه (د وږي ۲۷مه) په یوه خپرې کړې اعلامیې کې ویلي، چې له کلونو تحمل او ناڅرګند رنځ ګاللو وروسته به یاد پنځه امریکايي وګړي له خپلو کورنیو سره یو ځای شي.
په ورته وخت کې د امریکا د بهرنیو چارو وزیر انتوني بلېنکن له امریکايي وګړو غوښتي، چې ایران ته دې سفرونه نه کوي.
نوموړی زیاتوي، چې هېڅ ډول تضمین نه شته چې ایران ته له تلونکو امریکایانو سره به ایران ورته چلند نه کوي.
د واشنګټن او تهران ترمنځ د بندیانو او پیسو د تبادلې د هوکړې له مخې؛ ایران د پنځو امریکايي وګړو الوتکې ته د الوتنې اجازه ورکړه او په بدل کې یې جنوبي کوریا د قطر بانکونو ته د هغوی پور پېسې انتقال کړې.
تېره اونۍ د امریکا د بهرنیو چارو وزارت ویاند ویلي وو؛ واشنګټن موافقه کړې چې له جنوبي کوریا څخه په قطر کې د مالي بنسټونو محدودو حسابونو ته د ایران پیسې انتقال کړي؛ خو هېڅ پیسې مستقیماً ایران ته نه ځي.
نوموړي وویل، چې د دغو مالي مرستو له سپارلو وروسته به امریکا دغه پیسې وڅاري چې څنګه او کله کارول کېږي.
ایرنا خبري اژانس د ایران د بهرنیو چارو وزرات ویاند د ناصر کنعاني په حواله وايي، چې بندیانو ته نن اجازه ورکړل شوې او د دغو بندیانو د تبادلې په بدل کې یې د ایران شپږ میلیارده ډالره کنګل شوې پېسې د قطر بانک ته استولي دي.
د ایران پر جنوبي کوریا دغه مقدار پور هغه وخت کنګل شو، چې د امریکا مخکیني ولسمشر ټرمپ پر ایران بندیزونه ولګول او یادې پېسې له جنوبي کوریا سره پاتې شوې.
له هوکړې وروسته دغه پېسې د قطر بانکونو ته انتقال شوي دي.
د روسیې لومړي وزیر میخایل میشوستین ویلي؛ هېواد یې چمتو دی چې د "شمال او جنوب د سوداګرۍ دهلېز" د پراختیايي پلان په چوکاټ کې افغانستان او جنوبي اسیا ته د سوداګریزو توکو د لېږد رالېږد د لارو د جوړولو چارې ګړندۍ کړي.
هغه د دغې لارې سوداګریز اهمیت د سویز(سویس) کانال سره پرتله کړ.
د انټرفاکس خبري اژانس د راپور له مخې؛ میشوستین د دوشنبې په ورځ له خپل ازبک سیال سره په کتنه کې وویل، چې د دغو سوداګریزو لارو پراختیا د شمال او جنوب د نړۍوال سوداګریز دهلېز د پراختیا پر لور یو ګام دی. په دې دهلېز کې هند، ایران، اذربایجان، روسیه، منځنۍ اسیا او اروپا شامل دي.
میشوستین وویل؛ دوی چمتو دي چې په دې چوکاټ کې د افغانستان او جنوبي اسیا په ګډون د یورو- اسیا په سیمه کې د سوداګریزو لارو پر پراختیا تمرکز وکړي.
دغه روسي چارواکي ویلي، چې له ازبکستان سره د اورګاډي پټلۍ په برخه کې د همکارۍ د پراخ پلان جوړول او د دغه هېواد د هوايي تاسیساتو پیاوړي کول د روسیې له مهمو موخو څخه دي.
د اوکراین د جګړې له پیل سره روسیه د لویدیځ تر سختو بندیزونو لاندې ده او له اروپا سره یې سوداګري کمزورې شوې ده. مسکو پلان لري، چې د سیمې له هېوادونو سره د سوداګریزو اړیکو په پراختیا سره د لویدیځ د بندیزونو له امله رامنځته شوي فشارونه کم کړي.
د ازبکستان صدراعظم عبدالله اریپوف په منځنۍ اسیا کې د سوداګرۍ په لارو چارو کې د پانګونې لپاره د روسیې د لېوالتیا هرکلی کړی دی.
د انټرفکس په وینا؛ اریپوف وویل: "موږ لېواله یو، چې د بیلاروس، روسیې، قزاقستان، ازبکستان، افغانستان او پاکستان ترمنځ د سوداګریزو توکو په دهلېز کې شامل شو."
هغه زیاته کړه: "د دې پلان یو له مهمو اړخونو څخه د افغانستان د ټرانس کوریډور په نوم د اورګاډي پټلۍ جوړول دي."
د طالبانو یوه پلاوي د سرطان په میاشت کې پاکستان ته سفر وکړ او د دغې پټلۍ د تخنیکي بیا کتنې تړون یې لاسلیک کړ.
د افغانستان، پاکستان او ازبکستان ترمنځ د اورګاډي د پټلۍ د جوړولو پلان په ۲۰۱۸ کال کې د یوې اقتصادي لویې لارې د جوړولو په هدف وړاندې شو، چې منځنۍ اسیا به د هند سمندر له اوبو سره ونښلوي؛ خو د دواړو هېوادونو ترمنځ له ګڼو غونډو سره- سره د درې واړو هېوادونو د ریل پټلۍ چارواکو ویلي، چې تر اوسه یې تخنیکي مطالعات نه دي پیل شوي.
د دغې پټلۍ د جوړولو لګښت څه باندې څلور نیم میلیارده ډالره اټکل شوی او اوږدوالی به یې ۵۷۳ کیلومتره وي.
دا ریل پټلۍ له ترمز څخه پیل او له مزارشریف او کابل ښارونو څخه تر تېرېدو وروسته د پاکستان پېښور ته رسېږي.
د بښنې نړۍوال سازمان په افغانستان کې د نجونو پر زده کړو د بندیز د دویمې کلیزې په مناسبت وویل، چې په دغه هېواد کې بشري حقونه له هرې زاویې تر برید لاندې دي.
دغه سازمان د دوشنبې په ورځ (د وږي ۲۷مه) په یوه اعلامیه کې د نجونو پر زده کړو د بندیز د پای ته رسولو غوښتنه وکړه.
د بښنې نړۍوال سازمان په خپله اعلامیه کې زیاتوي، چې د نجونو پر زده کړو له بندیز دوه کاله وروسته افغانستان د «نه جبرانېدونکې تباهۍ» پر څنډه ولاړ دی.
د بښنې نړۍوال سازمان ویلي، چې طالبانو نه یوازې د افغانانو؛ په ځانګړې توګه د ښځو د حقونو د خوندیتوب په اړه خپلې ژمنې ماتې کړې، بلکې "د تاوتریخوالي لړۍ یې بیا پیل کړې او په بشپړ معافیت سره یې له بشري حقونو سرغړونې کړې دي."
د دغه سازمان د اعلامیې له مخې؛ دا مهال په افغانستان کې "بشري حقونه په هره برخه کې تر برید لاندې دي او باید یې مخه ونیول شي”.
دغه سازمان په خپله اعلامیه کې پر طالبانو غږ کړی، چې د ښځو او نجونو ټول حقونه چې په هر عمر کې زده کړو ته د هغوی د لاسرسي حق هم پکې شامل دی؛ تضمین کړي او د ښوونځیو دروازې دې سمدستي پرانیزي او مېرمنې دې بېرته کار کولو ته پرېږدي.
دغه سازمان همداراز ټینګار کړی، چې طالبان باید د بیان او ټولینزې ازادۍ حق تضمین کړي. د بشري حقونو دغه نړۍوال سازمان هم د ښځينه خبريالانو او لاريون کوونکو د تښتولو، خپلسرو نيولو او وهلو ټکولو د بندېدا غوښتنه کړې ده.
د بښنې نړۍوال سازمان په خبرپاڼه کې ویل شوي، چې طالبانو په سیستماتیک ډول د بشري حقونو د ساتنې ټول مهم بنسټونه منحل کړي او د بیان ازادي، عادلانه محاکم او نور بشري حقونه یې تر پښو لاندې کړي دي.
د دغې اعلامیې له مخې؛ په تېرو دوو کلونو کې په افغانستان کې د نجونو او ښځو له بنسټیزو حقونو څخه سرغړونه شوې او زرګونه افغانان په خپلسري ډول نیول شوي، شکنجه شوي، ورک شوي او حتا وژل شوي دي.
اعلامیې زیاته کړې چې خبریالان، د بشري حقونو مدافعین، هنرمندان، پوهان، مذهبي او په ځانګړې توګه قومي اقلیتونه د طالبانو تر واک لاندې افغانستان کې له خطر سره مخامخ دي.
د روان کال د وږي په میاشت کې د اوړي د رخصتیو په پای کې طالبانو له هلکانو او نارینه ښوونکو وغوښتل چې ښوونځیو ته ستانه شي، خو د نجونو او ښځینه ښوونکو د راستنېدو په اړه یې چوپه خوله پاتې شول، چې په وینا یې ښوونځیو ته د بېرته تګ اجازه نه ورکول کېږي.
طالبانو له هغه وخت راهیسې د نجونو پر زده کړو د بندیز لګولو له پرېکړې دفاع کړې ده، چې د دې ډلې مشرانو ویلي؛ د نجونو زده کړه "فرض نه ده" او هم د نجونو د زده کړو لپاره شرایط نه دي اماده شوي.
د اعتراضونو د کمولو لپاره، طالب چارواکو ویلي چې د نجونو پر زده کړو بندیز به تر امر ثاني پورې دوام لري.
د نجونو پر زده کړو او د ښځو پر کار بندیز څخه دوه کاله تېر شول، په نړۍواله کچه د طالبانو تر واک لاندې افغانستان کې د "جنسي نژادي تبعیض" په رسمیت پېژندلو غوښتنې ورځ تر بلې مخ پر زیاتېدو دي.
د بشري حقونو په برخه کې د روسیې لپاره د ملګرو ملتونو ځانګړې راپور ورکوونکې ماریانا کتزروا وايي، چې روسيې په پراخه کچه له اوکراین سره د جګړې منتقدین، د بشري او مدني حقونو فعالان نیولي دي.
نوموړې په خپل تازه راپور کې ویلي، چې روسیې د اوکراین د جګړې له پیله په سیستماتیک ډول خپله روسي مدني ټولنه ځپلې او منتقدین یې ډارولي دي.
د ملګرو ملتونو یادې راپور ورکوونکې زیاته کړې، چې روسیې په دوامداره ډول یو شمېر مدني فعالین شکنجه کړي او حتا ځینې یې د مرګ له ګواښ سره هم مخ دي.
له تېرو نېږدې دوو لسیزو راپه دېخوا دا لومړی ځل دی، چې د ملګرو ملتونو د بشري حقونو شورا د دغه نړۍوال سازمان د پنځو دایمي غړو”امریکا، فرانسه، چین، برېتانیا او روسیه” هېوادونو څخه یې په یو هېواد کې بشري وضعیت ارزوي.
په دغه راپور کې راغلي، چې ملګرو ملتونو په روسیه کې یو شمېر قانوني محدودیتونه مستند کړي دي، چې له مخې یې د مدني ټولنې غړي او بشري حقونو فعالان په دې تور چې دوی د جګړې مخالف دي د روسیې د حکومت له خوا ځپل شوي دي.
راپور زیاتوي، چې په روسیه کې په جبري ډول د یو شمېر خپلواکو رسنیو فعالیت هم محدود شوی دی.
د ملګرو ملتونو د دغه راپور پر وړاندې د روسیې د حکومت ویاند دیمتري پیسکوف ویلي، چې دوی د ملګرو ملتونو راپور نه دی لوستی.
له دې وړاندې هم یو شمېر نړۍوالو بنسټونو روسیه په اوکراین کې په بشري جنایت تورنه کړې وه، خو د روسیې ولسمشر پوتین او ګڼو نورو چارواکو د نړۍوالو خپلواکو بنسټونو دغه تورونه یوازې ادعاوې ګڼلې وې.
د واشنګټن او تهران ترمنځ د بندیانو او پیسو د تبادلې د هوکړې له مخې؛ ایران د پنځو امریکايي وګړو الوتکې ته د الوتنې اجازه ورکړه او په بدل کې یې جنوبي کوریا د قطر بانکونو ته د هغوی پور پېسې انتقال کړې.
تېره اونۍ د امریکا د بهرنیو چارو وزارت ویاند ویلي وو؛ واشنګټن موافقه کړې چې له جنوبي کوریا څخه په قطر کې د مالي بنسټونو محدودو حسابونو ته د ایران پیسې انتقال کړي؛ خو هېڅ پیسې مستقیماً ایران ته نه ځي.
نوموړي وویل، چې د دغو مالي مرستو له سپارلو وروسته به امریکا دغه پیسې وڅاري چې څنګه او کله کارول کېږي.
ایرنا خبري اژانس د ایران د بهرنیو چارو وزرات ویاند د ناصر کنعاني په حواله وايي، چې بندیانو ته نن اجازه ورکړل شوې او د دغو بندیانو د تبادلې په بدل کې یې د ایران شپږ میلیارده ډالره کنګل شوې پېسې د قطر بانک ته استولي دي.
د ایران پر جنوبي کوریا دغه مقدار پور هغه وخت کنګل شو، چې د امریکا مخکیني ولسمشر ټرمپ پر ایران بندیزونه ولګول او یادې پېسې له جنوبي کوریا سره پاتې شوې.
له هوکړې وروسته دغه پېسې د قطر بانکونو ته انتقال شوي دي.
له دغې هوکړې وروسته تېره اونۍ د امریکا پخواني ولسمشر ډونالډ ټرمپ د امریکا ولسمشر جو بایډن "بې کفایته" وباله او د هغه د ګوښه کېدو غوښتنه یې وکړه.
د امریکا پخواني ولسمشر ډونالډ ټرمپ د امریکا د اوسني ولسمشر جو بایډن پر حکومت نیوکه کړې، چې له مخې یې د ایران د بندو شپږو میلیاردو ډالرو په بدل کې د بندیانو د تبادلې په برخه کې شوې موافقې ته په کتو سره هغه "بې کفایته" بللی دی.