سرچینې: اصف درانی د یوه لوړپوړي پاکستاني پلاوي سره ډېر ژر کابل ته سفر کوي
افغانستان انټرنشنل ته ډیپلوماټیکو سرچینو ویلي، تمه کېږي چې د افغانستان لپاره د پاکستان ځانګړی استازی د یوه لوړپوړي پلاوي سره ډېر ژر کابل ته سفر وکړي.
په وروستیو کې د پاکستان لنډ مهالي لومړي وزیر په یوه لیک کې د طالبانو له رییس الوزرا « د ګډو موخو لپاره په ګده د کار» کولو غوښتنه کړې وه.
زموږ د سرچینو په وینا، د پاکستان استازی به کابل ته ولاړ شي چې د طالبانو سره د علاقې وړ دوه اړخیزو موضوعګانو پر سر خبرې وکړي.
تر دې وړاندې د پاکستان د لنهډمهالي لومړي وزیر لیک د افغانستان انټرنشنل لاس ته راغلی و، چې په کې انوارالحق کاکړ ملا حسن اخند ته لیکلي و:« پاکستان له افغانستان سره د ورورولۍ نږدې اړیکې لري، چې د دواړو هېوادونو په مذهبي، کلتوري او تاریخي مشترکاتو کې سره ریښې لري.»
کابل ته د پاکستاني چارواکو سفر په داسې حال کې کېږي، چې په تېرو ورځو کې د څووم ځل لپاره په تورخم کې د طالبانو او پاکستاني ځواکونو ترمنځ نښته وشوه.
د دغې نښتې په دوام، د تورخم لاره د لسو ورځو لپاره تړلې پاتې شوه.
که څه هم چې د پاکستاني او طالب چارواکو له اوږدو خبرو اترو وروسته د تورخم لار پرانیستل شوه؛ خو پاکستانۍ رسنیو لیکلي، چې په افغانستان کې د افغان طالبانو لهخوا پاکستاني طالبانو ته پناه ورکول د نښتو اصلي لامل و او لاتراوسه هم دغه لانجه سمه نهده هواره شوې.
دا لا څرکنده نهده، چې د افغانستان لپاره د پاکستان استازي سره به د کابل په سفر کې کوم پاکستاني چارواکي مله وي.