د ارمنستان لومړی وزیر نیکول پاشینیان وايي، د نګورنو قره باغ تسلیمېدو سره د زرګونو کډوالو کوربتوب ته تیارېږي. د هغه په خبره، دا مهال د قره باغ ارمنانو ته کوم مخامخ ګواښ نشته، خو د اذربایجان د جګړې له امله تر لس زرو ډېر کسان بې ځایه شوي دي.
د چارشنبې په ورځ د روسیې په منځګړتوب د نګورنو قره باغ ځايي ځواکونو د اوربند بدل کې د تسلیمېدو ژمنه وکړه، خو لا هم ځینې سیمو کې وسلوال مقاومات کوي.
د اذربایجان ولسمشر یوه سلاکار ویلي، کوم ځايي ځواکونه چې وسله پر ځمکه ږدي ښايي وبښل شي.
نګورنو قره باغ په نړیواله کچه د اذربایجان برخه بلل کېږي، خو تر یو لک شل زره اوسېدونکي یې ارمنان دي.
د ۱۹۹۰ کلونو په جګړه کې ارمنستان پرې ولکه وکړه، خو په ۲۰۲۰ کال کې یې بیا پر سره درنه جګړه ونښته چې باکو پکې ځینې سیمې بېرته ونیولې، اما د روسیې په منځګړتوب اوربند وشو.
د دې سیمې د کنټرول لپاره ارمنستان تېرو ورځو کې بیا جګړه پیل کړه او ځايي ځواکونه اوربند ته اړ شول
د اذربایجان ولسمشر الهام علی یف د چارشنبې ورځې اوربند ستر بری بللی او ویلي یې دي چې له څو لسیزو وروسته به پر دغه سیمه واکمن شي.
