د اصف دوراني په مشرۍ په دغه پلاوي کې پوځي چارواکي هم وو.
د سرچینو په خبره، پاکستاني پلاوي طالب چارواکو سره په خبرو کې د پاکستان پرضد د افغان خاورې د کارېدو له امله خپل سخت اعتراض وکړ.
سرچینې وايي، طالبانو له پاکستاني پلاوي سره ژمنه وکړه چې په افغانستان کې د تحریک طالبان پاکستان د فعالیت مخه نیسي.
د سرچینو د معلوماتو له مخې، د خبرو په پایله کې دواړه لوري په دې سلا شول چې د ډیورنډ کرښې دواړو غاړو ته د پولې د مديريت او امنيت بیا کتنې سره د ټي ټي پي د فعاليتونو مخه ونيسي.
تر دې لیدنې وروسته د طالبانو د بهرنيو چارو وزارت په یوه اعلامیه کې ویلی، چې امیر خان متقي د پاکستان له ځانګړي استازي سره په کتنه کې ويلي دي، چې د دواړو هېوادونو ترمنځ « امنيتي ستونزې» بايد د ګډو کمېټو له لارې حل شي او د سياسي او امنيتي دلايلو پر بنسټ بايد بندرونه ونه تړل شي.
د طالبانو په خبر پانه کې ويل شوي دي، چې دواړو لوريو پر امنيتي مسالو سر بيره د پاکستان په زندانونو کې له نيول شويو افغان کډوالو سره د ناسم چلند، د افغانستان د سبزيجاتو او تازه ميوو د صادراتو او د افغان سوداګرو د ترانزيتي توکو د صادرولو لپاره د لازمو اسانتیاوو د رامنځته کولو په اړه خبرې کړي دي.
د طالبانو د بهرنيو چارو وزارت د خبر پاڼې له مخې؛ امیرخان متقي ويلي دي، چې افغانستان او پاکستان بايد له هغو خبرو ډډه وکړي چې د دواړو خواوو ترمنځ د واټن د زياتوالي سبب کېږي.
د پاکستاني پلاوي دا سفر په داسې مهال دی چې پاکستان له طالبانو غواړي پر خپلو ژمنو ودرېږي او د پاکستاني طالبانو پرضد ګام پورته کړي.
اسلام اباد وايي، پاکستاني طالبان په افغانستان کې مرکزونه لري او له کرښې په اوښتو سره په پاکستان کې بریدونه کوي.
هغه څه چې طالبان يې په کلکه ردوي او وايي پاکستاني طالبان په پاکستان کې پراخ حضور لري او پاکستان دې په خپله خاوره کې د وسلوالو پرضد ګامونه واخلي.
د افغانستان لپاره د ځانګړي استازي په توګه تر ګومارل کېدو راهیسې دا کابل ته د اصف دوراني دویم سفر دی.
نوموړی دوه میاشتې مخکې هم کابل ته تللی او له طالب چارواکو سره یې لیدلي وو.
