پر افغانستان د طالبانو له څه باندې دوه کلنې واکمنۍ او په بېلابېلو برخو کې پر افغانو ښځو له سختو بندیزونو وروسته، د بشري حقونو فعالانو او د ښځو د حقونو ملاتړو د «جنسیتي توپیر» د رسمیت پېژندلو لپاره اعتراضونه پیل کړل.
دوی د لاریونونو او د نه خوړو د اعتصاب پرمهال له نړۍوالو وغوښتل، چې په افغانستان کې جنسیتي توپیر په رسمیت وپېژني.
له دغو اعتراضونو سره تېره ورځ ملګرو ملتونو بیا د لومړي ځل لپاره د بشري حقونو د سازمانونو او د هېوادونو د استازیو په ګډون په افغانستان کې د «جنسیتي توپیر» د ارزونې لپاره ناسته وکړه.
دغه ناسته چې د ملګرو ملتونو د عمومي اسمبلۍ په څنډه کې وشوه، په ملګرو ملتونو کې د افغانستان پخوانۍ استازې عادله راز وویل، د طالبانو د واکمنۍ پر مهال د افغانستان زړورې ښځې او نجونې د تصور وړ نهدي.
د نوموړې په خبره، د افغانستان اوسنی وضعیت یوې تراژیدۍ ته ورته دی او د افغانو ښځو حقونه او هیلې په سیسټماټیک ډول له دوی څخه تروړل شوې دي.
په ملګرو ملتونو کې د افغانستان استازي نصیر احمد فایق د خبرو پرمهال وویل، چې په افغانستان کې د طالبانو واکمني له جنسیتي توپیره کمه نهده.
دی زیاتوي، د افغانستان وضعیت د اندېښنې وړ دی او طالبانو له تېرو دوو کلونو راهیسې په سیستماټیک ډول د ښځو د حذفولو ترڅنګ د بشري حقونو سرغړونې کوي.
د دې غونډې په بله برخه کې بیا د ښځو په چارو کې د امریکا پخوانۍ استازې میلاني وایفیر د افغانو ښځو د مبارزې د ستایلو ترڅنګ وویل چې، نړۍواله ټولنه مسوولیت لري چې په افغانستان کې د بشري حقونو د سرغړونو عاملین محاکمه کړي.
د ملګرو ملتونو د عمومي اسمبلۍ په څنډه کې د «جنسیتي توپیر سره د مبارزې» په نامه د دغې رسمي ناستې جوړېدنه، د دغو کمپاینونو د فعالانو یوه لاسته راوړنه بلل کېږي.
دغه غونډه په داسې حال کې وشوه، چې تېره ورځ په ایران کې د افغان اعتراض کوونکو ښځو یوې ډلې د طالبانو تر واک لاندې افغانستان کې د خلکو په ځانګړې توګه د ښځو او ماشومانو د وضعیت په اړه د نړۍوالې ټولنې پر چوپتیا نیوکه وکړه.
دغه مېرمنې وايي، نړۍ د افغان ولس حالت د فلم په څېر ګوري.
اعتراض کوونکې میرمنې وایي، له «خاموشې نړۍ» څخه ستړې شوې او د طالبانو د ډلې پر وړاندې د سمدستي او جدي اقداماتو غوښتنه کوي.
