د پاکستان د پوځ مشر د دغه هېواد په پرمختګ کې د مسیحیانو د رول ستاینه وکړه

د پاکستان پوځ په یوه بیان کې ویلي، چې ښاغلي منیر د پاکستان په ملي پرمختګ په ځانګړې توګه د تعلیم او روغتیا په برخه کې د دوی د ونډې ستاینه وکړه.

د پوځ د وياند دفتر د دوشنبې په ورځ ليکلي، چې د پوځ مشر "د پاکستان د مسيحي ټولنې لپاره خپل ژور درناوى څرګند کړ او د مذهبونو د پيروانو ترمنځ يې د هماهنګۍ پر پياوړتيا ټينګار وکړ."

د پاکستان د کلیسا مشر ازاد مارشال، له ښاغلي منیر سره په لیدنه کې د "ترهګرۍ په وړاندې په جګړه کې د پوځ د رول" ستاینه وکړه، خو د هغه له قوله په بیان کې د عیسویانو په وړاندې د وروستي تاوتریخوالي یادونه نه ده شوې.

د پاکستان پوليسو د اسد په ٢٦مه اعلان وکړ، چې په پنجاب ايالت کې يې تر سلو زيات کسان د عيسويانو پر عبادتځايونو او کليساګانو د بريدونو په تور نيولي دي.

دغه بریدونه د اسد په ۲۵مه وروسته له هغه وشول، چې قهرجنو مسلمانانو ادعا وکړه چې دوو مسیحیانو د قران کریم "بې حرمتي" کړې ده.

د اېکسپرېس ټرېبیون د راپور له مخې؛ تر دې وروسته په پنجاب ایالت کې د عیسویانو سیمه تر سختې څارنې لاندې ونیول شوه.