د طالبانو د بهرنیو چارو وزارت یوه ویاند پر خپلې اېکس پاڼې لیکلي، چې د دې ډلې د بهرنیو چارو سرپرست وزیر د روسیې په رسمي بلنه د مسکو په لور روان شو. حافظ ضیاء احمد زیاتوي امیر خان متقي به دوه ورځې مسکو کې پاتې شي او بیا به د مسکو د فارمټ ناستې لپاره کازان ته لاړ شي.
دغه ناسته د جمعې په ورځ د (تلې په ۷مه) په روسیه کې د لسو هېوادونو د استازو په حضور کې ترسره کېږي.
تمه کېږي چې په دغې ناسته کې به د روسیې، هند، ایران، قزاقستان، قرغېزستان، چین، پاکستان، تاجکستان، ترکمنستان او اوزبکستان استازي ګډون وکړي.
د روسیې د بهرنیو چارو وزارت ویاندې ماریا زاخارووا د چهارشنبې په ورځ د ( وږي په ۲۲مه) په یوې خبري ناسته کې وویل، چې د مسکو فارمټ ناسته کې به د افغانستان پر اوسني وضعیت، د افغانانو ترمنځ پخلاینه، د سیمې امنیت او له جګړې وروسته د افغانستان د بیارغونې په اړه خبرې اترې وشي.
د اغلې زاخارووا په وینا؛ ګډونوال به د افغانستان په اړه د نظرونو له تبادلې وروسته یوه ګډه بیانیه هم خپره کړي.
د افغانستان لپاره د روسیې د ولسمشر ځانګړي استازي ضمیر کابلوف وړاندې ویلي وو، چې په افغانستان کې د ټولګډونه حکومت د جوړولو موضوع د دغې غونډې د اجنډا د سر موضوع ده.
د ښاغلي کابلوف په وینا؛ لا تر اوسه د داسې حکومت د جوړېدو په تړاو هېڅ پرمختګ نه تر سترګو کېږي.
د روسیې د بهرنیو چارو وزارت مرستیال انډري روډنکو ویلي، باید وپوهېږو چې د کازان ناستې ګډونوال او نړۍواله ټولنه د افغانستان د وضعیت د ښه کېدو لپاره څه کولای شي.
مسکو فارمټ په ۲۰۱۷ کال کې د افغانستان د شخړو د هواري لپاره جوړه شوې وه.
په کازان کې راتلونکې ناسته د مسکو د فارمټ د پنځو پړاوونو خبرې اترې دي.
په تېرې ناسته کې طالبانو ته بلنه نه وه ورکړل شوې.
