د طالبانو د بهرنیو چارو وزارت له سرپرست امیر خان متقي سره د اتریش د ازادۍ ګوند د دوو غړو د کتنې د خبر له خپرېدو وروسته دغه ګوند وویل، چې دوی د دغې سیاسي ډلې په استازیتوب له طالبانو سره نه دي لیدلي.
طالبانو په داسې حال کې د ازادۍ ګوند د دغو غړو هرکلی کړی، چې یاد ګوند په اتریش کې د کډوالو او اسلام پر ضد د خپل مخالفت او سیاسي کمپاین له امله پېژندل کېږي.
د ازادۍ ګوند د اتریش پلس ۲۴ وېبپاڼې ته ویلي، چې انډریا مولزر او یوهانس اوبنر په شخصي توګه افغانستان ته سفر کړی او ګوند د دوی له سفر څخه خبر نه و.
د اتریش د بهرنیو چارو وزارت هم د دغه سفر په غبرګون کې ویلي، دوی ته یې په ښکاره توګه سپارښتنه کړې وه چې افغانستان ته سفر ونه کړي.
د دغې وېبپاڼې د معلوماتو له مخې، د اتریش د بهرنیو چارو وزارت زیاته کړې چې د افغانستان په اړه د دغه هېواد پالیسي بدله شوې نهده او طالبان په رسمیت نه پېژني.
امیر خان متقي له دغو دوو اتریشي سیاستوالو سره په لیدنه کې «په ویانا کې د افغانانو د ستونزو د حل لپاره د قونسلګرۍ د خدمتونو د وړاندې کولو او د نورو اسانتیاوو د رامنځته کولو» په اړه خبرې کړې دي.
د طالبانو د بهرنیو چارو وزارت د ویاند مرستیال حافظ ضیاء احمد په اېکس شبکه کې د دوشنبې په ورځ د تلې په درېیمه په یوه ټویټ کې لیکلي: "د اتریش د ازادۍ ګوند غړیو ژمنه کړې، چې اروپا ته به د افغانستان رېښتینی انځور وړاندې کوي."
د طالبانو د بهرنیو چارو وزارت کابل ته د دغه اتریشي پلاوي د سفر موخه نهده په ډاګه کړې.
پلس ۲۴ ویب پاڼې د ازادۍ ګوند دغه دوه غړي "پخواني سیاستوال" بللي دي.
له دې سره، د اتریش په پارلمان کې د دغه ګوند مخالفو استازو توند غبرګون ښودلی دی.
د اتریش د محافظه کار مسیحي ډیموکرات ګوند عمومي منشي کریسټین اسټاکر د «یوه پېژندل شوي تروریستي سازمان له استازیو» سره د مولزر او اوبنر په کتنه نیوکه وکړه او ویې ویل، چې دا سفر د ازادۍ ګوند لهخوا د طالبانو د حکومت د په رسمیت پېژندلو په مانا دی.
