د امریکا د کنګل او واورې د شمېرو ملي مرکز اعلان وکړ، چې په سږني ژمي کې د سویلي قطب شاوخوا د کنګلونو کچه ټیټه شوې ده. دغه وضعیت پر سویلي قطب د اقلیمي بدلون منفي اغېزې او د قطبي ژویو لکه پنګوین په اړه د کارپوهانو اندېښنې زیاتې کړې دي.
د امریکا د واورې او کنګل د شمېرو ملي مرکز وایي، چې سږکال د سویلي قطب د سمندري کنګل پراخوالی ۱۶.۹۶ میلیون مربع کیلومټره دی او دا د ۱۹۷۹ راهیسې د دغه موسم تر ټولو ټیټه کچه ده. چې په دې توګه د تېر کال پرتله یو میلیون مربع کیلومټره لږه په کنګل پوښل شوې ده.
څېړنې ښیي، چې د بشري فعالیت له امله د شین کوریزه غازو خپرېدا د اقیانوسونو د تودوخې د کچې د لوړېدا لامل شوې او له دې سره د کنګلونو کچه هم ټیټه شوې ده.
د اسټرالیا په مانوش پوهنتون کې د سمندرونو د کنګلونو څېړونکی اریان پورېچ وایي:«دلته بنسټیز پیغام دا دی، چې د نړۍ د دغو کنګل شویو برخو د ساتنې لپاره اړتیا ده، چې د شین کوریزه غازونو د خپرېدا کچه ټیټه کړو.»
