د لیبیا لوی څارنوال د سېلابونو په مخنیوي کې د ناغېړۍ له امله د اتو چارواکو د موقتي نیولو امر وکړ.
د څارنوال په وينا، سره له دې چې په بندونو کې د درزونو د رامنځته کېدو په اړه راپورونه ورکړل شوي و؛ خو چارواکو يې د ترميم لپاره هېڅ نه و کړي.
د لیبیا په ډرنه ښار کې له ویجاړونکي سېلاب وروسته، د دغه ښار اوسېدونکو د وږي په ۲۷مه نېټه لاریون وکړ او له چارواکو یې د حساب ورکولو غوښتنه وکړه.
د وروستي رسمي راپور له مخې، په دغه ښار کې د سېلاب له امله لږ تر لږه ۳۸۶۸ کسان وژل شوي او زرګونه نور لادرکه دي.
د هغو اتو لیبیایانو په منځ کې چې څارنوالانو د دوی د نیولو امر کړی، اوه تنه یې د هېډرولیک سرچینو یا د بند د مدیریت مسوولیت درلود.
څارنوال په دې باور دی، چې دغو کسانو په خپلو "غلطیو" او "د ناورین په مخنیوي کې د ناغېړۍ" له امله په دې غمیزه کې لاس درلود.
د پلټنو له مخې، په لیبیا کې د بندونو د مدیریت ډلو د ۱۹۹۸ کال له پیل راهیسې په دوو جوړښتونو کې د درزونو راپور ورکړی و؛ خو د دوی د جوړولو لپاره یې هیڅ کار نه و شوی.
د ډرنه ښاروال، چې د ښاروالۍ د شورا د نورو غړیو ترڅنګ د سېلاب له ناورين وروسته له دندې ګوښه شوى، هم په تورنو کسانو کې دى.
نوموړی له " واک څخه په ناوړه ګټنې او د ښار د پراختیا لپاره د ځانګړې شوې بودجې په ناسم مدیریت" هم تورن دی.