د پاکستان احتساب محکمې د پیپلز ګوند د مهمو مشرانو پخواني ولسمشر اصف علي زرداري او پخواني لومړي وزیر یوسف رضا ګیلاني پرضد د نېب دوسیې بیا راپورته کړې. داحتساب محکمې د پنجشنبې په ورځ دواړو سیاستوالو ته احظارلیک لېږلی او ترې غوښتي یې دي چې د اکتوبر پر ۲۴ پخپله محکمې ته ور شي.
د پاکستاني رسنیو د راپور له مخې ورته دوسیې د پخواني لومړي وزیر نواز شریف، شهباز شریف، شاهد خاقان عباسي، راجه پروېز اشرف او شوکت عزیز او مالیې وزیر اسحاق ډار په هکله را ژوندۍ شوې دي.
د پخواني لومړي وزیر عمران خان پسې ایتلافي حکومت د نېب قانون له مخې دا دوسیې ختمې کړې وې.
خو عمران خان له محکمې غوښتي و چې دا کېسونه بېرته ژوندي کړي.
د پاکستان لوی قاضي عمر عطا بندیال د سپتمبر پر ۱۵ د خپلې دندې په وروستۍ ورځ د عمران خان د غوښټنې په حق کې پرېکړه وکړه او د نېب له لسو ترمیمونو یې نهه بې قانونه وبلل.
د خېبر پښتونخوا پولیسو د ترهګرۍ ضد څانګې په ترهګریزو فعالیتونو کې د لاس لرلو په تور د ۱۳۵ کسانو لېست خپور کړی او د یادو کسانو په اړه معلومات ورکوونکو ته نغدي انعام هم اعلان شوی دی.
د خېبر پښتونخوا د پولیسو د ترهګرۍ ضد ادارې(سي ټي ډي) نن پنجشنبه (د تلې ۶مه) په یوې اعلامیې کې د یادو کسانو لېست خپور کړی، چې پکې یوه ښځه او ماشوم هم شامل دي.
دغې ادارې ویلي، چې یوه ښځه او ماشوم هم په ترهګریزو فعالیتونو کې لاس لري چې د ډېره اسماعیل خان اوسېدونکي دي.
په بیان کې راغلي: “ د هر مطلوب کس په اړه د معلوماتو په بدل کې نغدي انعام ورکوي او د دوو مطلوبو کسانو د معلوماتو په بدل کې ۱۰ میلیونه کلدارې ورکوو”.
د پولیسو د ترهګرۍ ضد اداره زیاتوي، چې دغو کسانو په ترهګرۍ، باج اخیستو، انسان تښتونو او هدفي وژنو کې لاس درلود.
د یادونې وړ ده، چې په دې وروستیو کې په پاکستان او په ځانګړي ډول په خېبر پښتونخوا کې د ناامنۍ او ترهګریزو پېښو په شمېر کې د پام وړ زیاتوالی راغلی.
پاکستاني چارواکو په وار - وار نیوکه کړې، چې په پاکستان کې په کېدونکو ترهګریزو پېښو کې افغانان لاس لري، خو طالبانو بیا د دوی ادعاوې رد کړي دي.
د ملګرو ملتونو سازمان د ماشومانو د ملاتړ وجهي صندوق یا یونېسف وايي، دا مهال په افغانستان کې نېږدې ۱۶ میلیونه ماشومان بشري مرستو ته اړتیا لري.
یونېسف زیاتوي، چې په افغانستان کې له نېږدې دېرش میلیونه اړمنو کسانو څخه یې نېږدې نیمايي برخه چې ماشومان دي بشري مرستو ته اړتیا لري.
دغه سازمان په خپل نوي خپاره کړي راپور کې وايي: “په افغانستان کې له ۲۹،۲ میلیونه اړمنو کسانو څخه ۱۵،۸ میلیونه ماشومان بشري مرستو ته اړتیا لري”.
یاد سازمان زیاتوي، چې په دغو ماشومانو کې ۸۷۵۰۰۰ یې له پنځو کلونو څخه کم عمرونه لري او د شدیدې خوارځواکۍ له امله درملنې ته ضرورت لري.
یونېسف په خپل راپور کې ویلي، چې د روان کال له پیله تر اګسټ میاشتې پورې په ۳۳۳ ولسوالیو کې د شدیدې نسناستې نېږدې ۱۵۲۰۰۰ پېښې ثبت شوې دي.
یونېسف دا راپور په داسې مهال خپروي، چې روانه اونۍ د خوړو نړۍوال پروګرام (ډبلیو اېف پي) ویلي، که په افغانستان کې اړمنو کسانو ته د اړتیا وړ مرستې ور نه کړل شي، دا به د طالبانو تر واک لاندې افغانستان کې د ښځو د ژغورنې د وروستۍ لارې له لاسه ورکول وي.
د خوړو نړۍوال پروګرام د سې شنبې په ورځ (د تلې ۴مه) په اېکس شبکه کې لیکلي، چې د بودیجې د کمښت او نشتوالي له امله به یو میلیون میندې او د هغوی ماشومان له خوراکي مرستو بې برخې شي.
دا په داسې حال کې ده، چې په افغانستان کې د طالبانو له واکمنۍ وروسته ښځې په بې ساري توګه له ټولنې څخه لېرې کړی شوي او له امله یې په دغه هېواد کې د بې وزلۍ کچه زیاته او د مرستو بهیر هم له جدي ننګونو سره مخامخ شوی دی.
د خوړو نړۍوال پروګرام زیاته کړې، د بودیجې د کمښت له امله دغه پروګرام اړ شوی، چې په افغانستان کې له اړمنو کسانو سره خپلې مرستې کمې کړي او شاوخوا ۱۵ میلیونه افغانان د سخت بشري ناورین له ګواښ سره مخامخ شي.
په کراچۍ کې د طالبانو د قونسلګرۍ سرپرست عبدالجبار تخاري په پاکستان کې پر افغانانو ظلمونو ته په اشارې سره وايي، چې د کابل او اسلام اباد ترمنځ د اختلافاتو بيه افغان کډوال ورکوي.
د پاکستان کابینې په دې وروستیو کې د ۱،۵ میلیونه افغان کډوالو د ویستلو هغه طرحه تصویب کړه، چې په پاکستان کې د اوسېدو قانوني اسناد نه لري.
د فرانسې خبري اژانس د پنجشنبې په ورځ (د تلې ۶مه) په پاکستان کې د افغان کډوالو په اړه یو راپور خپور کړی دی.
د ملګرو ملتونو د کډوالو د عالي کمېشنرۍ د شمېرو له مخې؛ دا مهال په پاکستان کې شاوخوا ۳.۵ میلیونه افغان کډوال مېشت دي، چې یوازې ۱.۳ میلیونه یې په قانوني توګه ثبت دي.
پر افغانستان د طالبانو له واکمنۍ وروسته تر ۶۰۰ زرو ډېر افغان کډوال پاکستان ته تللي.
افغان کډوال د دغه هېواد پولیس د پیسو په اختلاس او د قانوني اسنادو له پامه غورځولو تورنوي.
د نقیب الله په نوم یوه افغان کډوال د فرانسې اژانس ته وویل؛ وروسته له هغه چې د پاکستاني پولیسو له خوا ونیول شو، پلار یې د خوشې کېدو لپاره ۱۶۰ امریکایي ډالره رشوت ورکړ.
د کراچۍ پولیسو تېر کال له دغه ښاره د شاوخوا ۱۸۰۰ افغان او پاکستاني کډوالو د شړلو اعلان وکړ او ویې ویل چې سږ کال یې شاوخوا ۱۷۰۰ افغان او پاکستاني کډوال نیولي دي.
د کراچۍ د پولیسو مشر د فرانسې خبري اژانس ته وویل: «زموږ موخه یوازې غیرقانوني کډوال دي.»
هغه د قانوني اسنادو لرونکو کسانو د نيولو او د پولیسو په منځ کې د رشوت اخيستلو تورونه رد کړل او ويې ويل چې په دې اړه بايد څېړنې وشي.
د کراچۍ په کمپ کې د طالبانو د کډوالو وزارت استازی حبیب الرحمن وايي: "هر درې یا څلور کاله وروسته [د افغان مهاجرینو پر ضد] بد چلندونه کیږي، خو دا ځل تر ټولو بد دی".
په پاکستان کې د افغان بندیانو وکیله منیزا کاکړ وايي: «په دې وروستیو کې هغه کسان چې ایستل شوي دي، ناروغان، د بشري حقونو مدافعین او ښځینه زده کوونکې دي.»
سید عبدالجبار پر افغان مهاجرینو د زور زیاتي د نیوکې ترڅنګ وايي، چې د دواړو هېوادونو تر منځ ستونزې باید د خبرو په مېز حل شي.
په کراچۍ کې د طالبانو قونسلګرۍ وایي، د افغان مهاجرینو ویستل د طالبانو او پاکستان ترمنځ د اختلافاتو سره تړاو لري.
د پاکستان او طالبانو ترمنځ اړیکې د پاکستان مرز سره د پولې په اوږدو کې د اورپکو بریدونو د زیاتوالي له امله خړې شوي، چې اسلام اباد ادعا کوي دا بریدونه د افغانستان له خاورې پلان شوي دي.
څه موده وړاندې د پاکستان او طالبانو ترمنځ د سرحدي شخړې له امله د تورخم دروازه د نهو ورځو لپاره تړل شوې وه.
د هند حکومت د مانیپور ایالت مرکز او نورو تاوتریخوالي ځپلو سیمو کې د پنجشنبې په ورځ ګرځبندیز ولګاوه دا ګرځبندیز د دوو زدکوونکو د تښتولو او وژلو ادعا پسې پیدا شوي تاوتریخوالي کې د لسګونو زدکوونکو تر ژوبلېدو وروسته اعلان شو.
له میانمار سره پر پوله پروت شمال ختیځ ایالت مانیپور توکمیز تاوتریخوالي پر سر اخیستی او ځینې کارپوهان د دوو ځايي قبیلو ترمنځ د ځمکې او دندو پر سر دا جنجال کورنۍ جګړې ته ورته بولي.
یوه چارواکي له نوم پرته رویټرز ته ویلي، په پروني تاوتریخوالي کې تر اتیا ډېر زدکوونکي ټپیان شوي دي.
د هغه په خبره، له دې پېښې وروسته وسلوالو د واکمن ګوند دفتر زیانمن کړ او د پولیسو دوو مرکزونو ته یې هم لمبه يي بمونه ور ګوزار کړل.
په مانیپور کې له پنځو ورځو راهیسې موبایل انټرنټ خدمتونه هم بند شوي دي.
تېره مۍ میاشت کې پّ دغه ایالت کې د تاوتریخوالي پیلېدو راهیسې تر ۱۸۰ ډېر کسان وژل شوي او تر پنځوس زرو ډېر بې کوره شوي دي.
د مانیپور په ۳.۲ میلیون وګړو کې له نیمايي ډېر د میټي قبیلې اوسېدونکي دي او پاتې ۴۳ سلنه هم کوکي قبیلهه جوړوي چې تر ډېره په غرونو کې اوسېږي.
پرونۍ مظاهره چې په تاوتریخوالي واوښته د میټي قبیلې د دوو زدکوونکو د وژنې غبرګون کې وه.
دا زدکوونکي تېر جولای کې ورک و او روانه اونۍ یې مړي وموندل شول.
د سویس د یخچال څارنې اداره وايي، د دغه هېواد یخچالونه په تېرو دوو کلونو کې د ۳۰ کلونو په اندازه ویلې شوي دي او دا یو ناورین دی. د دې ادارې په خبره، سږ کال هم د ۲۰۲۲ کال په څېر د سویس یخچالونو ته دویم تر ټولو بدل کال و او په دغو دواړو کلونو کې یې لس سلنه حجم ویلې شوی دی.
د سویس یا سویزلنډ د یخچال څارنې مسوول متیس هوس له رویټرز سره خبرو کې سږنی کال د دغه هېواد د یخچالونو لپاره ډېر بد بللی دی.
د هغه په خبره، ژمی واوره ونه ورېده او دوبی هم ډېر ګرم و: «د دې دوو فکتورونو ترکیب ډېر بد دی چې یخچالونو ور سره مخ کېدلی شي.»
د سوېس د یخچال څارنې اداره په اعلامیه کې هم وايي، د کمې واورې ژر ختمېدونکي ژمي او اوږد ګرم اوړي یخچالونو ته ډېر تاوان ورساوه.
اګست میاشت کې د یخچال د ویلې کېدو په اوج کې د سویس د هواپوهنې ادارې وویل، د باران له امله د یخ ویلي کېدو نوی ریکارډ جوړ کړی او د پنځه زرو ۲۸۹ متره لوړوالي سره یخ په یوه شپه کې ویلې شوی چې لوړوالی یې له مونټ بلان څوکې جګ دی.
تېر کال دا ریکارډ ۵۱۸۴ متره و.
هوس وايي، سویس کې کوچني یخچالونه ویلې کېږي، پاتې یخ له ډبرو او خځلو لاندې کېږي او کومې سیمې چې له لسیزو او پېړیو راهیسې یخ پټې کړې وې پر تورو لمنو اوړي او د ډبرو ښویېدو خطر هم لري.
د سویس یخچال څارنې ادارې په مرکزي سیمو کې د ډېر ویلې کېدو له امله د یخچالونو څار بند کړی دی.
سویس پر ۱۹۱۴ کال د ځینې او پر ۱۹۶۰ کال د ټولو ینچالونو ریکارډ پیل کړ.